Muntens

De Biquipedia
Ir a la navegación Ir a la búsqueda
Muntens
Map-balkans-vlachs.png
Mapa d'os Balcans con as poblacions vlacas y rumanas.
Rechions con comunidatz importants
Muntenia (Rumanía)
Idiomas
rumán
Relichión
Cristiana ortodoxa
Pueblos relacionatos
Pueblos vlacos

Os muntens son una etnia europea que habita en Muntenia (Rumanía). Son cristians ortodoxos y charran rumán.

Modo de vida tradicional[editar | editar código]

En a ribera d'o Danubio y as planas de Muntenia o modo de vida tradicional ye l'agricultura. Destacan os cautivos cerialistas (a prencipios de sieglo un tercio d'a producción de cerial europeu proveniba de Rumanía), y cautivo d'o chirasol. En o cabalto d'os monts Carpatos bi ha un pastoreyo transuant.

Luenga[editar | editar código]

O standard d'a luenga rumana de basa en as parlas de Muntenia, que son dacorrumanas meridionals.

Historia[editar | editar código]

En o sieglo XIII os hongaros prenioron o control de Vlaquia pa protecher-sen d'os tartres-mongols. O voivot Basarab, dimpués de vencer a lo rei d'Hongría en 1330, creyó un estato ortodoxo independient con metropolitán en Argeş en 1359.

Os otomans invadioron Vlaquia en 1395. Se creyó una cruzata cristiana con hongaros y franceses que fue redotata en a batalla de Nikipol en 1396, y dende ixe inte o voivot de Vlaquia habió de pagar un tributo a los otomans. Vlaquia quedó asins como un estato tampón entre o reino d'Hongría y o Imperio Otomán. Os hongaros fracasoron debant os otomans en 1444 en Varna y en 1448 en a batalla de Kosovo.

En 1459 o voivot Vlad Ţepeş se negó a pagar tributo a los otomans y Vlaquia encomenzó a resistir a invasión otomana primer con o refirme d'Hongría. En 1462 os otomans redotoron a Vlad Ţepeş y posoron a lo suyo chirmán de voivot. En 1476 os hongaros posoron a Vlad Ţepeş como voivot pero fue redotato por os otomans, que dominarán Vlaquia dica o sieglo XVIII.

Dominio otomán[editar | editar código]

O rechimen otomán no suposó una ocupacion melitar de tot o prencipato, pero os otomans cosiraban o nombramiento de voivotz. Os vlacos se rebeloron contra os otomans con Mihai Viteazu ("Miguel o Valient", "Miguel o Bravo"), que estando voivot de Vlaquia en 1593, esdevenió prencipe de Transilvania en 1599 y se fació nombrar voivot de Moldavia en 1600. Por primera vegata os tres principatos yeran unitos baixo una mesma autoridat nativa, pero fue redotato en 1601 y os autriacos esclaforon a revuelta vlaca en 1601.

Dende o setio de Viena en 1683 os otomans encomienzoron a reblar en Europa debant d'o Imperio Austriaco primero y dimpués d'o Imperio Ruso. Os otomans pretendeban reforzar as suyas posicions en Moldavia y Vlaquia y sustituyorn os voivotz por hospodars fanariotas, griegos de Costantinoble. Os hospodars yeran nombratos dreitament por o soldán por tres anyatas. O rechimen fanariota yera a saber-lo d'explotador.

En 1718 por o tractato de Passarowitz os austriacos s'apoderoron d'o Banato y d'Oltenia. En o tractato de Belgrado de 1739 Oltenia se reintegró en Vlaquia.

Os exercitos rusos entroron por primera vegata en Moldavia en a decada de 1760. Os rusos conquirioron temporalment Buchac, Moldavia y Vlaquia y en 1772 entroron en Bulgaria. O tractato de Küçuc-Kaynarca en 1774 atorgó a lo zar de Rusia o dreito d'advertencia a lo soldán sobre Moldavia y Vlaquia. O tractato permitió que os boyardos feudals vlacos obtenesen en 1802 que os hospodars fuesen nombratos por siet anyatas y que a destitución y nombramiento se fese d'alcuerdo con os gobiernos otomán y ruso.

En 1806 as tropas rusas con enchaquia d'a destitución de l'hospodar de Vlaquia invadioron os principatos y por o tractato de Bucarest en 1812 Rusia obtenió Besarabia.

Entre rusos y otomans[editar | editar código]

Os principatos de Moldavia y Vlaquia esdevinioron estatos tampons entre os dos imperios. En 1821 i habió una revuelta en os principatos obra de Tudor Vladimirescu, que dende Oltenia yera a la cabeza d'una revuelta social y nacional y tamién obra d'una sociedat secreta griega con base en Odesa que prebaba de liberar a los ortodoxos d'os Balcans. Os rebels vlacos en Bucarest daban la culpa d'a situación a los fanariotas.

Os otomans tornoron a controlar a situación pero o rechimen fanariota ya heba deixato d'existir. A convención d'Akkerman de 1826 entre rusos y turcos sustituyó o estatuto por un condominio: os hospodars autotonos serían esleitos por siet anyatas y sozmesos a l'aprobación d'o soldán y o zar. En 1827 os rusos y turcos tornoron a estar en guerra dica que o tractato d'Adrianopoli en 1829, que adchudicaba as bocas d'o Danubio a Rusia y cambeyaba o estatuto d'os principatos, que serían gubernatos por principes vitalicios y preneban autonomía administrativa total.

Amés os reglamentos organicos de 1830 preveyeban que cada prencipato tenese una Constitución aprobata por Sant Petersburgo y Costantinoble y dimpués por l'asambleya (de propietarios). O nuevo rechimen se posó en marcha mientres as tropas rusas ocupaban Moldavia y Vlaquia (que no evacuarán dica 1834). Os prencipes gubernoron d'astí enta debant cosiratos por os consuls de Rusia.

En abril de 1848 o prencipe Sturza de Moldavia superó tres días achitación social en Iaşi, pero en Bucarest esclató en chunio una revolución que obligó a lo principe Bibescu a formar un gubierno provisional.

As tropas rusas entroron en Moldavia en chulio, y en septiembre tamién en Vlaquia chunto con os otomans. A convención ruso-otomana de Balta-Liman de mayo de 1849 suspendió os reglamentos organicos y fació tornar a lo sistema de nombramiento d'os hospodars.

Unión de Vlaquia con Moldavia y autonomía[editar | editar código]

En 1853 o exercito d'o Imperio Ruso tornó a invadir Moldavia y Vlaquia, o Imperio Otomán lis declaró a guerra y dimpués facioron o mesmo Francia y Gran Bretanya, que no quereban que o Imperio Ruso sustituise a lo Imperio Otomán como potencia que dominaba a zona. As potencias occidentals atacoron Crimea y prenioron Sebastopol. Por o Tractato de París de 1856 Rusia entregó as bocas d'o Danubio a lo Imperio Otomán y cedió bells territorios esgallatos de Buchac (Besarabia d'o Sud) a lo principato de Moldavia pa que tenese salita a la mar Negra. S'alcordó que o estatuto d'os principatos fuese redefinito por una conferencia internacional. Tanimientres os Reglamentos organicos permitioron que i hese unas eleccions en 1857: os unionistas ganoron tanto en Moldavia como en Vlaquia. A convención de París de 1858 optó por o compromís que os prencipatos unitos de Vlaquia y Moldavia tenesen cadagún un prencipe autoctono, un gubierno, una asambleya y un tribunal de chusticia común. Pero en 1859 as dos asambleyan esleyoron por unanimidat a lo mesmo prencipe Alexandre Ion Cuza. A unión ya yera un feito, y lo Imperio Otomán lo reconoixió en 1861.

Alexandre Cuza, que heba recibito una educación francesa, fació adoptar una constitución bonapartista y prebó de modernizar o país, por o que una coalición de liberals y conservadors l'obligó a abdicar en 1866. Ion Bratianu convenció a l'alemán Carl von Hohenzollern-Sigmaringen que acceptase o puesto de prencipe y fue proclamato en mayo de 1866 con o nombre de Carol I. Se aprebó una nueva Constitución en chulio y lo nombre de "Rumanía" se fació oficial. O soldán dio a suya aprebación en octubre.

Vlaquia en a independencia de Rumanía[editar | editar código]

Carol I yera parient d'o emperador d'Alemanya y veyeba o vasallache con o Imperio Otomán como un anacronismo. Quan en 1877 se producioron as mortaleras en Bulgaria, Rusia atacó a lo Imperio Otomán con o refirme de Rumanía. Por o tractato de Berlín de 1878 Rumanía cedeba a Rusia a parte de Buchac que serviba d'acceso a la mar y recibió en compensación Dobrucha, que en o Imperio Otomán no feba parte de Vlaquia. O reconoiximiento d'a independencia total fue en 1880, dimpués d'una revisión d'a Constitución de 1866, on i heba un articlo que deciba "només que os forans de relichión cristiana pueden obtener a qualidat de rumans", prencipio que yera incompatible con a presencia de muitos musulmans en Dobrucha (turcos, tartres y nogais). Carol I fue coronato rei de Rumanía en mayo de 1881. A ilesia ortodoxa rumana esdevenió una ilesia autocefala en 1885 con a suya seu metropolitana en Bucarest.

Primera Guerra Mundial[editar | editar código]

Quan esclató a primera Guerra Mundial Rumanía yera neutral, pero en octubre de 1914 morió Carol I y lo succedió o suyo sobrín Ferrando I, y os dirichents de Rumanía fuoron seducitos pa entrar en a guerra. Os Imperios centrals prometeban Besarabia si Rumanía participaba en o suyo bando, os Aliatos prometeban Transilvania. Rumanía apostó por o bando aliato en 1916 por a promesa d'una muga muit occidental con Hongría, a linia Debrecen-Szeged. O 27 d'agosto Rumanía declaró a guerra a Austria-Hongría y as suyas tropas invadioron Transilvania entrando de Braşov d'on fuyen os hongaros. Manimenos en setiembre as tropas rumanas han de fuyir chunto con 80.000 vlacos transilvans.

Dimpués os imperios centrals lanzoron una contraofensiva contundent y prenioron Bucarest en aviento de 1916 ocupando Vlaquia y Dobrucha. O gubierno rumán se refuchió en Iaşi y conservó Moldavia con l'aduya d'exercitos rusos. Dimpués d'a revolución d'octubre Rumanía quedó aislata y habió de firmar un armisticio con Alemanya y Austria-Hongría en Focşani o 9 d'aviento de 1917.

Manimenos en Kichinev s'establió a Republica Democratica de Moldavia, que proclamó a suya independencia en 1918 y dimpués a unión con Rumanía en abril. Con o tractato de Brest-Litovsk o 3 de marzo de 1918 Rumanía se quedó de tot ya sin aduya rusa y as potencias centrals tornoron a atacar-la. Por o tractato de Bucarest d'o 7 de mayo de 1918 Rumanía habió de ceder Dobrucha d'o sud (quadrilatero de Silistra) y 170 lugars d'os Carpatos a Hongría. Vlaquia siguió ocupata y habió d'abastir de trigo y [[petrolio] a Alemanya y Austria-Hongría.

L'armisticio de Villa Giusti o 3 de noviembre fació que s'esboldregase o Imperio Austro-Hongaro. O gubierno rumán aguardó dica o 10 de noviembre pa continar as hostilidatz en o zaguer inte. O 15 de noviembre os rumans invadioron Transilvania. O 28 de noviembre Bucovina, que heba estato una posesión austriaca, demandó a unión con Rumanía. O 1 d'aviento de 1918 os vlacos de Transilvania y d'Hongría se reunioron en Alba Iulia, se constituyoron en asambleya y esleyoron un Gran Consello nacional que o día 14 demandó a unión con Rumanía. Os saxons s'achuntoron o 8 de chinero de 1919. O 24 d'o Parlamento de Bucarest ratificó totas as decisions de unión, incluita a de Besarabia, no reconoixita por a URSS.

En 1919 o Tratato de Saint-Germain-en-Laye con Austria confirmó a unión de Bucovina, y o tractato de Neuilly con Bulgaria confirmó que Dobrucha d'o sud (Quadrilatero de Silistra) perteneixeba a Rumanía. A muga con Hongría y o Reino d'os Serbios, Crovates y Eslovens quedó por definir y no se resolverá en o Tractato de Trianon, en o que Transilvania, Crişana y a metat d'o Banato pasarán a Rumanía.