Miguel Jiménez-Herrero Gargallo

Miguel Jiménez-Herrero Gargallo
Consellero d'Información y Propaganda d'o Consello Rechional de Defensa d'Aragón
16 d'octubre de 1936 – 7 d'aviento de 1936
President	Joaquín Ascaso Budría
Gubierno	Gubierno Ascaso
Succediu por	Evaristo Viñuales Larroy
Naiximiento	5 de mayo de 1899 Zaragoza (Comarca Central, Aragón)
Muerte	13 de chinero de 1983 Arnouville (Val de l'Oise, Francia)
Atras afiliacions politicas	CNT
Conchuche	María Ascaso Budría
Profesión	Impresor, anarcosindicalista y politico

Miguel Jiménez-Herrero Gargallo (Zaragoza, 5 de mayo de 1899 - Arnouville, 13 de chinero de 1983) estió un impresor, anarcosindicalista y politico aragonés, consellero d'Información y Propaganda d'o Consello Rechional de Defensa d'Aragón.

Biografía

Naixiu de Zaragoza, prencipió a suya militancia en a CNT en a suya ciudat natal, encara que posteriorment se tresladó ta Barcelona a on s'integraría en o Sindicato d'Artes Graficas. En Blanes fació parti d'o grupo editor d'o periodico El Productor, participando tamién activament en a reorganización d'os grupos anarquistas en os zaguers anyos d'a dictadura de Primo de Rivera.

Estió secretario cheneral d'a Federación de Grupos Anarquistas d'Espanya, convocando a conferencia de grupos anarquistas de Valencia celebrada os días 24 y 25 de chulio de 1927, a on se creyaría a Federación Anarquista Iberica (FAI). Por ixas envueltas estió tamién colaborador de Prismas l'organo oficioso d'os anarquistas espanyols en Francia que se publicó en Besers entre 1927 y 1928. Colaboró tamién en ista epoca en atras publicacions libertarias, como Acción Social Obrera (Sant Feliu de Guíxols), El Sembrador, Solidaridad Obrera, El Vidrio u Suplemento de Tierra y Libertad. Dende aviento de 1928 fació parti d'o grupo "Solidaridad", una iniciativa que miraba de reagrupar toz os sectors d'a CNT sin d'exclusions ideolochicas. En os anyos 1930 estió mayestro racionalista en l'ateneu d'o barrio d'El Carmel en Barcelona. En 1935 estió un d'os redactors d'o periodico barcelonés Liberación. Ta par d'alavez festellaba con María Ascaso Budría, chirmana de Joaquín Ascaso Budría y prima de Francisco Ascaso Abadía, con qui dimpués tenió un fillo, Miguel Jiménez Ascaso.

En esclatar a Guerra Civil Espanyola, con a formación d'o Consello Rechional de Defensa d'Aragón dentró a fer parti d'él como consellero d'Información y Propaganda, cargo que ocuparía dica aviento de 1936, cuan se remodeló o Consello d'Aragón y albandonó a suya consellería pasando a estar secretario de Presidencia y de relacions municipals y comarcals d'o Consello dica a suya disolución en agosto de 1937.

En febrero 1939, cuasi en rematar a guerra, marchó ta Francia cruzando a muga por o Pireneu oriental y establindo-se primero en Bordeus y dimpués amán de París, a on continó embrecau en a causa anarquista, colaborando con publicacions como Atalaya, Espoir, Le Combat Syndicaliste, Solidaridad Obrera y Umbral. Morió en 1983 por una malautía cardiaca.

Vinclos externos

• (es) Miguel Jiménez Herrero.
• (fr) Miguel Jiménez Herrero. Dictionnaire des militants anarchistes.
• (ca) Miguel Jiménez-Herrero Gargallo. Nord-est llibertari.
• (es) Expo Consejo de Aragón