Linache d'os Mur

De Biquipedia
(Reendrezato dende Linache de Mur)
Ir a la navegación Ir a la búsqueda

Mur ye l'apellido d'un linache d'infanzons aragoneses que, d'alcuerdo con bells autors, serían naturals d'A Fueva (Sobrarbe, provincia de Uesca),[1] a on que les s'ha puesto documentar dende o sieglo XVI en a localidat d'Aluchán y dende o XIV en Muro de Roda.[2] L'apellido se conoix posteriorment en localidatz dispersas tanto en a comarca d'o Sobrarbe como en belaltras d'Aragón, y etimolochicament s'ha quiesto relacionar con a población fortificada de Muro de Roda[1]Muro Mayor» u simplament «Muro» en qualques textos historicos), enguán despoblada.

Bells autors en citan camals que habrían puesto fundar casas nuevas en Biarche, Aflor, Peralta d'Alcofeya y A Luenga en o Semontano de Balbastro, Benás,[1] Chía y Santa Llestra en a Ribagorza, y en puntos tan luent d'a suya presumpta casa matriz d'o Sobrarbe como dica Chaca[1] y Exeya d'os Caballers.[1]

Manimenos, un proceso d'infanzonía sostenido en a val de Chistau (Sobrarbe, provincia de Uesca), en a localidat de Saraviello en 1652 da treslau que bells presonaches naixidos en ixa val y que lievaban o mesmo apellido no teneban conoixencia de garra antipasau d'ellos que, en lievando-lo, no fese naixido si que en a dita val de Chistau, por el que d'estar ciertos os argumentos que i esgrimión os Mur chistavins (se conoix procesos d'infanzonía en ells que os interesaus gosaban mentir ta obtener o títol), a teoría d'as oríchens fovanas podría estar falsa u incompleta.

De tiempo inmemorial y antiquísimo de cuio principio no ha havido ni hay memoria de hombres en contrario hasta ahora, y de presente siempre y continuamente en el lugar de Serbeto situado en el valle de Xistao en lo más áspero y fragoso de los montes Pirineos, ha existido y existe un Casal o palacio de notorios Infanzones y Hijosdalgos del renombre y apellido de Mur, el qual ha confrontado y confronta con plaza pública, Iglesia parroquial del mismo pueblo y con casa y huerto de un beneficio de que es patrón el posehedor de dicho Casal y todos los demás poseedores, originarios y procedentes del mismo por recta línea masculina.[3]
Proceso d'infanzonía; 1652.

Isto fa pensar que as oríchens de l'apellido sigan anteriors a lo quiesto sieglo XVI quan que se datan os primers Mur de A Fueva, y enlaza con una altra teoría que postula que l'apellido dimana d'un noble d'o sieglo XIII a qui lo rei Pero III, lo Gran, le habría atorgau o previlechio d'infanzonía.[2] Ista posibilidat se troba documentada en un altro proceso d'infanzonía, en iste caso de 1327,[2] más de 40 anyos dimpués que morise lo dito rei, y el sinya una presona qui heba nombre Chuan de Mur, con residencia en Muro de Roda,[2] por el que torna a cruzar-se con a val d'A Fueva.

Manimenos, por a disparidat de posibles oríchens, y por o numer de casas que ya se documentan con l'apellido en o sieglo XV (sieglo en o qual as fuents fiables en chenealochía son ya muit escasas), cal no descartar belaltras hipotesis, como as oríchens diverchents de l'apellido (en estando una parola que gosa tener sentido en romance, podría haber apareixido en diferents puntos cheograficos, con radices toponimicas) u tamién que se remonten á bell momento de l'alta Edat Meya d'o quál dificilment se'n podrá tener conoiximiento.

Referencias[editar | editar código]

Vinclos externos[editar | editar código]