José Mavilla Villa

José Mavilla Villa
Consellero d'Agricultura d'o Consello Rechional de Defensa d'Aragón
16 d'octubre de 1936 – 7 d'aviento de 1936
President	Joaquín Ascaso Budría
Gubierno	Gubierno Ascaso
Succediu por	Adolfo Arnal Gracia
Naiximiento	1910 Sarinyena (Monegros, Aragón)
Muerte	1939?
Atras afiliacions politicas	CNT
Profesión	Mayestro, anarcosindicalista y politico

José Mavilla Villa (Sarinyena, 1910 – ?, 1939? ) estió un mayestro, anarcosindicalista y politico aragonés, consellero d'Agricultura d'o Consello Rechional de Defensa d'Aragón.

Biografía

Naixiu de Sarinyena (atras fuents sinyalan Sieso como puesto de naixencia), estudió Machisterio en a Escuela Normal de Uesca, a on estió disciplo, chunto a atros importants anarquistas uescanos como Evaristo Viñuales u Francisco Ponzán, de Ramón Acín Aquilué.

Vivió en Barcelona en zaguerías d'os anyos 1920 mientres se remataba de graduar como mayestro. Ya instaurada a Segunda Republica Espanyola treballó en o País Basco, estando un d'os delegaus representants d'os sindicatos de Bilbau en o Congreso d'a CNT en Madrit en 1931. O golpe d'estau y esclatiu d'a Guerra Civil Espanyola le pilla treballando de mayestro en Balbastro, a on s'heba tresladau en 1931. Yera un autonomista convenciu y expresó ascape o suyo deseyo de recuperar a personalidat politica y iniciativa propia pa Aragón, demandando ya en octubre de 1936 dende Balbastro l'autonomía efectiva pa Aragón, que ta par d'alavez yera dependient d'as milicias y a Cheneralidat catalanas.

Con a formación d'o Consello Rechional de Defensa d'Aragón en octubre de 1936, Mavilla ye nombrau consellero d'Agricultura, cargo que mantendrá dica aviento de 1936 con a remodelación d'o consello cuan ye substituyiu por Adolfo Arnal Gracia.

Colaboró tamién desde o 15 de febrero de 1937 con a publicación cenetista d'Aragón y Barcelona Cultura y Acción y Solidaridad Obrera, estando por ixas envueltas nombrau secretario d'a Federación Rechional d'as Colectividaz d'Aragón que se trobaba en Casp y dende iste puesto promovió a formación d'escoletas y minchadors escolars pa aduyar a las mullers en a suya liberación. L'11 d'agosto de 1937 as oficinas, almagacens d'intercambio y instalacions colectivas d'as tres provincias aragonesas son asaltadas por fuerzas combinadas comunistas y catalanistas d'as 11^ena, 27^ena y 43^ena divisions de l'Exercito de l'Este, disolvendo-se o Consello d'Aragón y estando feito presonero Mavilla chunto a otros líders anarquistas.

Permaneixió en a garchola dica marzo de 1938, poquetas horas antis d'a presa de Balbastro por as tropas franquistas, cuan podió eslampar chunto con atros cenetistas, estando buscau por os comunistas dica zaguerías d'ixe anyo.

En os zaguers días de guerra, en marzo de 1939, Mavilla encara s'integró en un Comité de Coordinación y Defensa. En rematar a guerra lo empresoron os franquistas, condenando-lo a muerte y executando-lo en un puesto y calendata desconoixius.

Vinclos externos

• (es) José Mavilla Villa en Con Nombre & Apellidos.
• (es) José Mavilla Villa en Real Academia de la Historia.
• (es) Expo Consejo de Aragón