Historia de Montenegro

De Biquipedia
Ir a la navegación Ir a la búsqueda

A historia de Montenegro como territorio individualizau con respecto d'atras tierras balcanicas comenzó en a Edat Meya quan os serbios locals formoron principatos como Duklja/Doclea/Zeta. Os habitants de Zeta y dimpués Montenegro podioron evitar a dominación otomana, a diferencia d'atros pueblos d'os Balcans. Manimenos dimpués d'a primera Guerra Mundial s'unioron a atros pueblos eslavos vecins pa formar o Reino d'os Serbios, Crovates y Eslovens primero y dimpués Yugoslavia, estando Montenegro o zaguer territorio en independizar-se de l'antiga Yugoslavia, fendo-lo en l'anyo 2006.

Os principatos y reinos serbios medievals[editar | editar código]

Costantín Porfirocheneta nombró una serie de principatos serbios en a suya obra "De administrando imperio". O territorio actual de Montenegro corresponde a una zona en a que este emperador bizantín situa Zahumje y Zeta/Doclea. Zeta/Doclea esdevinió uno d'os dos principals estatos serbios.

En o sieglo XI o knez Stefan Voislav encomenzó una revuelta contra la dominación bizantina y en 1042 consiguió una gran victoria en Tudjemili (Bar), rematando con a influencia bizantina sobre a suya tierra.

En o Gran Scisma d'Occident de 1054 Doclea quedó adintro d'a zona d'influencia d'a Ilesia Catolica y Bar esdevinió bispato en 1067. En 1077 o Papa Gregorio VII reconoixió Doclea como estau independient, reconoixendo tamién como rei a Miguel, o succesor y fillo de Stefan Voislav. A Santa Seu pretendeba trobar en Doclea una cabeza de puent en meyo de l'Orient ortodoxo, manimenos pa os bizantins o estau de Doclea, aislau en meyo d'as montanyas, no yera important[1]. Miguel establió a suya capital en Shkodër.

A politica expansiva d'os reis d'a dinastía Vojislavljević levó a controlar atras tierras eslavas como Zahumlje, Bosnia y Raška. Manimenos o poderío de Doclea declinó y en o sieglo XII quedó baixo subchección d'os grans principes de Raška. Stefan Nemanja fue naixiu en 1117 de Ribnica (actual Podgorica) y prenió Doclea en 1168 como Gran Zhupan serbio.

Dimpués d'a caita d'os Nemanjić, en o sieglo XIV unas dinastías serbias locals prenioron o poder. O Principato de Zeta fue gobernau por as casas de Balšić (1356–1435) y Crnojević (1435–1498). Dimpués d'a muerte d'o zaguer miembro d'a casa de Balšić a tierra de Zeta s'unió a lo Despotato de Serbia. Os Crnojević teneban o refirme d'a Republica de Venecia, que heba preso o control d'as Bocas de Cattaro. O sinyor de Zeta Ivan Crnojević fue vencito por os otomans y habió d'establir-se en posicions mes seguras enta l'ueste, en as montanyas d'a redolada de Cetinje. Movió a seu d'o metropolitán de Zeta dende Prevlaka a Cetinje, que esdevinió a suya capital. Dende ixe inte o suyo estau fue conoixiu como Crna Gora en serbo-crovata, que os venecians traducioron como Montenegro.

Montenegro independient y os principes-bispes[editar | editar código]

A primers d'o sieglo XVI quasi todas as atras tierras habitadas por serbios cayoron en mans d'os otomans. Una part de l'actual Montenegro dita Sandžak de Novipazar estió baixo control otomán dende 1498 dica 1912. A zona costera de l'actual Montenegro yera baixo control d'a Republica de Venecia con o nombre d'Albania Veneta. Os territorios serbo-montenegrins independients consistiban en:

  • - Viello Montenegro (territorio de Cetinje y part de Danilovgrad).
  • - Brda u Sedam Brda ("Os Monts" u "Os Siet Monts", con territorios d'o nordeste de Montenegro, a on que viviban os siet clans: Vasojevići, Bjelopavlići, Piperi, Kuči, Bratonožići, Morača y Rovca).
  • - Viella Herzegovina, una zona en o ueste de Montenegro que fació part d'o efimero estau medieval d'Herzegovina.

En 1516 Montenegro permaneixió como principato independient con un status especial baixo una teorica sobiranía d'o Imperio Otomán, que encara reivindicó dica o Congreso de Berlín de 1878. Qui en realidat tenió o poder en o Montenegro independient estioron os principes-bispes de Cetinje. A teocracia d'os principes-bispes creyó una fuerte identidat rechional en Montenegro, encara que os montenegrins d'ixos tiempos continaban percibindo-sen ellos mesmos como serbios. Manimenos en estos tiempos que o centro politico serbio yera en o Norte encomenzó a formación d'una identidat montenegrina deseparata d'a identidat serbia cheneral. Danilo Petrović Njegoš establió relacions con Rusia en 1711 en ixas envueltas de Per o Gran, lo que li permitió recibir-ne aduyas.

Dende o mandato de Danilo Petrović Njegoš, os principes-bispes perteneixioron totz a la dinastía d'os Petrović, que teneba un sistema succesorio curioso en o que o hereu yera o sobrín d'o principe-bispe.

Edat Moderna[editar | editar código]

En 1851 Danilo Petrović Njegoš esdevinió vladika, pero en 1852 asumió o títol de principe sin asumir o títol de bispe, transformando a suya tierra en principato secular. Con a secularización o knez ya no tendría mas o cargo de bispe.

Esclató una guerra contra os otomans, que fuoron vencius en 1858 en a batalla de Grahovo. En 1875 bi habió una revuelta en Bosnia-Herzegovina que Montenegro y Serbia aproveitoron pa declarar en 1876 a guerra a los otomans. A intervención rusa permitió a los montenegrins un resultau beneficioso en o Tractau de Sant Stefano de 1878, que fue confirmau en o Congreso de Berlín de 1878. O Congreso de Berlín reconoixió a independencia de Montenegro y permitió l'anexión de territorios a lo norte (una part d'Herzegovina) y l'este, a més d'un acceso a la mar en Bar (Antivari). L'anexión de Dulcigno en 1881 ixampló l'acceso a la mar.

Guerras balcanicas y primera Guerra Mundial[editar | editar código]

Montenegro1913.png

En o marco d'os nacionalismos d'o sieglo XIX os dirichents de Montenegro se percibiban ellos mesmos como serbios y deseyaban restaurar o imperio serbio medieval[2], por o que yeran rivals d'os dirichents d'a recient Serbia independient. En 1912 Montenegro esdevinió reino. O Reino de Montenegro intervinió en a primera Guerra Balcanica asitiando Shkodër, y a pesar d'haber perdiu 10.000 vidas en a conquiesta d'esta emblematica ciudat, o Tractato de Bucarest de 1913 la concedió a lo nuevo estau d'Albania. Manimenos o territorio de Montenegro se tornó a ixamplar con l'anexión d'a metat sud d'o Sanchak de Novi Pazar y d'a Rechión de Peć en o Kosovo.

O exercito montenegrín participó en a primera Guerra Mundial chunto con Serbia. O cheneral serbio Bozidar Jankovic fue nombrau chefe tanto d'o exercito serbio como d'o montenegrín. O exercito montenegrín acompanyó a lo exercito serbio en o suyo destín y habió de retirar-se. O 27 d'aviento de 1915 evacuoron a ciudat de Cetinje.

Montenegro en a primera Yugoslavia[editar | editar código]

O 26 de noviembre de 1918 a dinastía Petrović fue deposada por l'asembleya nacional montenegrina aplegada en Podgorica y votó que Montenegro s'adhibís a un nuevo estau que se yera fendo pa incluyir a los eslavos d'a part occidental d'os Balcans. Montenegro pasó d'esta traza a fer part d'o Reino d'os Serbios, Crovates y Eslovens. En o periodo d'entreguerras amaneixioron dos faccions oposadas entre os habitants de Montenegro: os "blancos" y os "verdes". Os "blancos" yeran partidarios cerrinos d'a unión con os serbios y s'oposaban a fer distincions entre serbios montenegrins y atros serbios. Os "verdes" reivindicaban una reorganización d'o reino sobre una base federal y no yeran conformes con o control d'o estau que teneban os serbios d'o gubierno de Belgrado[2]. Muitos politicos montenegrins yeran de part d'os serbios en os conflictos entre serbios y crovates que marcoron a politica yugoslava d'o periodo d'entreguerras.

Montenegro en a segunda Guerra Mundial y en a segunda Yugoslavia[editar | editar código]

En a segunda Guerra Mundial Montenegro fue ocupau por a Italia faixista y o suyo territorio redueito por l'anexión a Italia d'a redolada de Kotor/Cattaro, a on que bi heba una población italiana parlant d'o venecián.

Os guerrillers prenioron o control de muitas zonas montanyosas. Bi heba una guerrilla monarquica serbia (os chetniks) y una guerrilla comunista (os partisans). Entre os chetniks bi heba montenegrins d'o partiu "blanco". en 1943 os partisans que bi heba en Bosnia troboron refuchio en Montenegro dimpués d'a Batalla d'o río Neretva. Manimenos en ixe mesmo anyo os estaus d'o Eixe tornoron a atacar a los partisans en Montenegro, que salioron victoriosos en a Batalla de Sutjeska, batalla que marcó un punto d'inflexión y que fue seguida d'atras victorias partisanas, devez que a capitulación italiana de 1943 posa a situación encara millor pa os partisans. Dimpués d'as victorias partisanas de 1943 o exercito alemán y os suyos aligaus fuoron forachitaus progresivament de Montenegro y tot o territorio de l'antiga Yugoslavia.

En 1946 se constituyó a Republica Socialista de Montenegro con notables cambios territorials. Fuoron incluyidas en o nuevo Montenegro as bocas de Cattaro, que heban perdiu buena part d'a suya población italiana, pero a redolada de Peć pasó a depender de Kosovo. A historica ciudat de Cetinje deixó d'estar a capital, que pasó a Podgorica, ciudat que fue rebaptizada con o nombre de Titograd.

En o decenio de 1980 creixió o nacionalismo serbio en tot o territorio de l'antiga Yugoslavia, incluyiu Montenegro. Quan en 1991 encomienza a descomposición d'a Republica Federal Socialista de Yugoslavia, y Montenegro permaneixe sin independizar-se y participa contra os crovates de Ragusa y Konavle en a Guerra d'independencia crovata chunto con os serbios d'Herzegovina oriental y o Exercito Federal Yugoslavo. O desarrollo d'as guerras yugoslavas de secesión fació creixer entre os montenegrins un deseyo de desvinclar-se de Serbia, que heba quedau aislada y desprestichiada internacionalment. Muitos montenegrins reivindicoron a existencia d'una nacionalidat montenegrina diferent d'a nacionalidat serbia y amaneixió un montenegrismo que levó a la independencia de Montenegro en 2006. En o sieglo XXI ha creixiu en Montenegro a influencia rusa, notable en o sector turistico.

Referencias[editar | editar código]

  1. (fr) Dennis P.Hupchick, Harold E.Cox: Les Balkans. Atlas historique. Ed Economica, 2008. p 36
  2. 2,0 2,1 (es) Felipe Fernández-Armesto: Los hijos de Zeus. Pueblos, etnias y culturas de Europa. 1996 Grijalbo. pp 295-297.

Bibliografía[editar | editar código]