Gran Hongría

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
O Reino d'Hongría en 1918.

A Gran Hongría (en hongaro:Nagy-Magyarország) ye un concepto politico irredentista que propugna a unificación de toz os hongaros u hongaro-parlants en un mesmo estato. Iste concepto politico naixe con a redota en la Primera Guerra Mundial de l'Imperio Austrohongaro y o consigüient Tractau de Trianon (1920) que quitó a o Reino d'Hongría mas d'un 70% d'o suyo territorio. Iste territorio fue atorgato a os nuevos estatos vecins de Checoslovaquia, Ucraína, Serbia, Rumanía, y Austria. Debito a iste tractau cuasi 5 millons d'hongaros u hongaro-parlants quedoron dillá d'as nuevas mugas d'Hongría, y a-saber-las ciudaz hongaras fuoron absurdament dividitas por a metat quedando cada parti en un país diferent.

Politica d'estato[editar | modificar o codigo]

O Tractau de Trianon fue considerato como una liberación ta as nacions que viviban en l'Imperio Austrohongaro. Manimenos, a opinión publica hongara considera que o Tractau de Trianon no estió a solución chusta ta as nacionalidaz que viviban en a monarquía austrohongara, mas que mas ta os hongaros. En opinión d'os irredentistas, Hongría fue privata d'o 70% d'o suyo territorio oficial. Mientres a rechencia de Miklós Horthy o concepto d'a recuperación d'a Gran Hongría se tornó en politica d'estato con a que se buscaba refirmar a os hongaros que heban quedato difuera d'o estato hongaro resignatos a las nuevas mugas establitas, y que no heban estato modificata mientres tot un milenio dende a fundación d'o reino por Sant Esteban I en l'anyo 1000.

Pleito sobre Transilvania[editar | modificar o codigo]

Pegallos reivindicativos d'a Gran Hongría.

Dimpués d'a redota hongara contra l'Imperio Otomán, en a batalla de Mohacs de 1526, o Reino d'Hongría quedó dividito en tres partis: una baixo o control austriaco, una atra baixo o control turco y a tercera parti estió Transilvania, que se convirtió en un Prencipau autonomo aintro de l'Imperio Otomán. Transilvania, se mantenió alavez baixo o gubierno d'a nobleza hongara, y eventualment prencipió sin d'exito cuantas guerras d'independencia anti-Habsburgo, ta mirar de reunificar o reino hongaro. Igualment mientres a Guerra d'os Quince Anyos, Transilvania s'alió con os alemans contra os turcos y continó con o suyo obchectivo reunificador y independentista.

Transilvania a o largo d'a suya historia estió un estato verdaderament multicultural, a on as tres prencipals nacions (hongara, székely y saxona) teneban os mesmos privilechios y importancia. Dimpués, obligatos a emigrar dende Valaquia, muitos rumanos pobloron o Prencipau, augmentando en una cantidat muit considerable a la ya existent en ista epoca. Posteriorment, os censos d'o sieglo XIX [1] amuestran que a mayoría d'a población de Transilvania ya yera rumana.

Cal destacar que mientres a invasión turca a Europa, que remató con a resistencia hongara en 1526, o Prencipau independient de Transilvania estió gubernato por sinyors y prencipes transilvanos de parla y identificación cultural hongara, que protechioron y veloron por a supervivencia d'a cultura hongara mientres 170 anyos, dica que Transilvania fue liberata d'os turcos, ta estar ocupata por os austriacos en 1699. Hongría no podió liberar-se d'o chubo austriaco dica 1919, dimpués d'haber feito incontables guerras d'independencia y haber aconseguito "l'alcuerdo" de 1867, que creyó a monarquía dual, a on Austria reconoixeba un parlamento propio en Hongría.

Obchectivos actuals[editar | modificar o codigo]

Actualment bi ha cuantas organizacions irredentistas que aspiren a cambear as mugas y creyar una Gran Hongría en a Unión Europea. Os irredentistas exichen a devolución de territorios d'atros países europeus como Austria (a rechión de Burgenland), Serbia (a rechión de Voivodina), Rumanía (a rechión de Transilvania), y Eslovaquia, que se quitoron a Hongría dimpués d'a Primera Guerra Mundial.

Bibliografia[editar | modificar o codigo]

Referencias[editar | modificar o codigo]

  1. (ca) Árpád Varga E., "Els hongaresos a Transilvània entre 1870 i 1995, Títol orichinal:Erdély magyar népessége 1870-1995 között ' ', Magyar Kisebbség 3-4, 1998 (Sèrie nova IV), pp. 331-407. Traducito por Tamás Sályi, Teleki László Foundation, Budapest, 1999.