Eufonía

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A eufonía ye o sonar bien una palabra u frase. Explica bel cambio fonetico por influencia de fonemas cercanos y fa que hi haiga asimilacions y disimilacions pe evitar sonius seguius que puedan no fer goyo a qui charra u a los interlocutors. S'oposa a la cacofonía.

En palabras en as que se repetirían dos -ll- palatals o fenomeno d'a eufonía explica a simplificación d'a -LL- cheminada latina enta una simpla -l- en cuenta de enta a -ll- palatal d'alcuerdo con a fonetica aragonesa regular. Son os casos de pelello, valello, coladiello, Castelillo, Viliella y calella (cheosinonimo occidental de "callizo"). Atra tendencia present en aragonés n'estos casos ye a evolución d'a cheminada latina -LL- enta -r-, o que beluns han considerau como d'influencia gascona. Son os casos de perello, varello probablement mes extendius que as variants eufonicas con -l-, y os toponimos Variellas y Casterillo.

En os casos d'os toponimos castellanizaus Caleja[1] y Castelejo y de palabras como pelejo en o castellano d'Aragón a eufonía mos permite remotar-nos a la fase lingüistica aragonesa on ixa -j- encara no heba substituyiu a la -ll- palatal. Juan Antonio Frago testimonia a forma caleja como denominación corografica de Muel y Terrer y Calentejo como nombre d'una carrera en Magallón y testimonia tamién textos medievals on se puede leyer calieilla y callella en Tudela:

iuxta casas Sancti Saluatoris, et ex alia parte iuxta illam calelam

(1188)

est verto es ante la bodega del Rei, et del altra part, cerca el muro, et de la cuarta part, cerca la calieilla que va a la puerta de Vilieilla

(1236)

Referencias[editar | modificar o codigo]

  1. (es) Juan Antonio Frago Gracia: Toponimia Navarroaragonesa del Ebro (III): Vías de Comunicación. AFA 28-29, 1981, pags 31-56.