Esvarizaculos

Un esvarizaculos

Un esvarizaculos u eslisaculeros ye una construcción de caracter recreativo, que consiste en una rampa eslizadiza elevada en a suya parti posterior por una escala que permite l'ascenso a la parti superior pa proceder a esvarizar-se sobre a superficie. Se puet considerar como a parti central d'a diversión en os parques acuaticos modernos.

Se tracta d'una parola compuesta formada por o verbo "esvarizar" (d'o latín vulgar *exvarāre), mover-se (una persona u cosa) sobre una superficie, rastrando-se, eslenando-se u esvarando-se, y o substantivo "culo", a parti d'o cuerpo sobre a que mos posamos y por tanto esvarizamos.

Tipos d'esvarizaculos

Por a suya forma

Esvarizaculos en espiral

Os esvarizaculos son tradicionalment metalicos, ubiertos y con una superficie recta. Manimenos, bi ha atras menas de esvarizaculos:

Esvarizaculos en un parque acuatico

• Esvarizaculos de tubo. Consiste en una estructura circular de plastico a traviés d'a que se'n foten os ninos.
• Esvarizaculos en espiral. A superficie pa esvarizar-se ye plastica y describe una curva que puet estar mas u menos zarrada.
• Esvarizaculos de diferents pendients . A superficie presenta dos u mas pendients sobre as que esvarizar-se.
• Esvarizaculos acuatico. Propio de parques acuaticos, sobre a suya superficie corre una tela d'augua que favoreixe poder eslizar-se. Iste esvarizaculos puet estar de gran largaria y tien cuantas altarias y a-saber-las curvas en o suyo camín. A diferencia d'a resta, en o esvarizaculos acuatico se pueden adoptar diferents posturas d'arranque:
  • Posau
  • Chitau entabant
  • Chitau entazaga

Components

Os components d'un esvarizaculos acuatico pueden variar d'alcuerdo a l'uso que se'n faiga, pero basicament en un parque acuatico bi ha:

• Esvarizaculos u rampa. Por un regular de fibra de vidre con curvas y chiros, encara que bi'n ha rectos, que son os mas arriscaus como o "kamikaze".
• Torre d'acceso. Sirve pa arribar a la parti de salida, puet estar metalica, de cimento, de fusta u emplegando altarias cheograficas d'o terreno.
• Torre de soporte. A on s'asienta o esvarizaculos.
• Equipo mecanico. Conforman as bombas y filtros independients d'o sistema de recirculación d'as piscinas pa captar l'augua pa o esvarizaculos.
• Piscina exclusiva d'arribada. S'ha de considerar una piscina exclusiva pa l'arribada d'os banyistas pa mirar d'evitar accidents. Encara que ye habitual que se meta en piscinas existents con as debidas normas de seguridat.

Por o tipo d'acceso

Se puet acceder a o esvarizaculos dreitament por una escala u bien con una construcción en a que os ninos se pueden entretener aportando mas valura estetica a la obra. A estructura puet adoptar as formas mas variadas: torreta, fuerte, caseta, etc. Asinas mesmo, l'acceso se puet fer a traviés de cuantos elementos, bien alternativament, bien en o mesmo chuego: escalas, cuerdas, espalderas, etc.

Vinclos externos

• Se veigan as imáchens de Commons sobre esvarizaculos.

• Datos: Q334747
• Multimedia: Playground slides / Q334747