Estela discoidal
Una estela discoidal ye un molimento funerario que se puet trobar en bellas zonas d'Europa occidental, Rusia, Berbería, y Orient meyo (Siria y antiga Armenia). Ye tipico d'os fosals meyevals d'a comarca d'o Matarranya y encara ye abundant en os fosals d'o País Vasco Francés, on son conoixitas como Hilarri.
En as estelas entallaban simbolos pagans solars como rosetas, flors d'a vida, y cristians. En as estelas discoidals d'o País Vasco Francés ye tipica a presencia de quatrefuellas.
A tradición de fer estelas discoidals ye antiga y ya en a Edat d'o Bronze en tenemos eixemplos en o sudueste d'a Peninsula Iberica (estelas d'o sudueste). A Estela de Luna ye un caso anomalo porque por as suyas caracteristicas ye clasificable como una estela d'o sudueste y s'ha trobato en o noreste d'a peninsula.