Tractau de París (1898)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo ye sobre o Tractau de París de 1898 entre Espanya y Estaus Unius que remata a Guerra Hispano-estausunidense; ta atros usos, se veiga Tractau de París.

O tractau de París ye un tractau internacional sinyau o 10 d'aviento de 1898 en a ciudat francesa de París por representants d'o reino d'Espanya y d'a republica d'os Estaus Unius, y por o que remataba o estau de guerra entre ixos dos estaus, a dita Guerra Hispano-estausunidense.^[1]

En o tractau, Espanya reconoixeba a suya redota de raso en a guerra, y acceptaba a independencia de Cuba, amás de ceder a los Estaus Unius as suyas antigas posesions colonials en Filipinas, Guam y Puerto Rico, rematando asinas con istos zaguers repuis o dito Imperio espanyol.^[1] Antiparte, Estaus Unius amaneixeba como una nueva gran potencia, prencipiaba a suya expansión por l'Oceano Pacifico (que en zaguerías levó a la guerra con Chapón) y establía o suyo control en a mar Caribe, que en zaguerías significó o prencipio d'o intervencionismo estausunidense en America latina.

Una destacada consecuencia d'o tractau estió a humillación que suponeba ta l'Exercito espanyol, a qui heba redotau de raso l'Exercito estausunidense en todas as batallas, y que s'adedicó a demandar a intervención en Marruecos ta sustituyir con ixe país as colonias perdidas y prebar de recuperar-ie prestichio, y a on se establioron as bases d'o grupo militar que remató en 1936 por organizar un golpe d'estato contra o Gubierno d'a Segunda Republica espanyola y que segnificó o prencipio d'a Guerra civil espanyola. O tractau y a humiliación subsiguient tamién reforzó o sentimiento d'o nacionalismo espanyol que dende ixe inte s'eixerceba sobre as atras nacionalidaz d'a peninsula iberica.