Bruco

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Bruco de a especie Calluna vulgaris.

O bruco (d'o latín <BRUCCIU y iste d'o galo <*vroico) ye o nombre popular con o cual s'identifica a cualques especies vechetals d'a familia d'as ericacias caracterizadas por o porte arbustivo no superior a 2 metros d'altaria, follas muit menudetas y atipidas en as brancas, y una florada densa con flors chicorronas y muit numerosas, de color rosa, vrioleta u blanca.

Hábitat

Cuasi todas as especies de bruco son intolerants a suelos calsineros u de Ph basico, y precisan de terrens acidos que son poco frecuents en Aragón, por o que son plantas poco abundants. I ha formacions de bruco en bels puertos de montanya en o Pireneu axial, a on que o suelo ye acido de forma excepcional, como en o macizo d'a Maladeta, en a val de Benás. Por ixe motivo, en bels puestos de l'Alto Aragón, o saber popular l'atribuye d'estar una planta propria de l'alta montanya, anque ista conclusión ye erronia porque no i creix por limitacions climaticas (a mayoría d'especies podrían creixer en una diversidat de climens muito mas ampla, y de feito lo fan en belatras rechions) sino por as condicions de suelo tan particulars que precisa.

Especies

En a Peninsula Iberica son frecuents as siguients especies, que se conoix como bruco:

• Calluna vulgaris - A mas abundant.
• Erica cinerea
• Erica scoparia
• Erica vagans - Sí que ye propria de l'alta montanya.
• Erica arborea

Pero a denominación puede fer-se extensiva a belatras especies de caracteristicas morfolochicas pareixidas, principalment en os cheneros Erica y Cassiope.

Fitonimia

En a val de Benás se documenta a forma «brueco» ta nombrar a istas plantas, que en o pasau bellas fuents han dau erroniament por cheneral en aragonés.

En a Sierra d'Albarracín, o Xiloca y La Rioja a especie Calluna vulgaris recibe a denominación de biércol, denominación pareixida a brécol, que se diz en l'aragonés de Bisagorri, Renanué y en o catalán ribagorzano d'Espés, y a brócal en Castanesa y Bonansa.

Una extensión en a que predominan os brucos se diz «brucal» u «brocal». Tamién se diz «bruguera» y ha dau un apelliu toponimico. Os apellius Brugalla y Brualla tamién se relacionan con iste tipo de matas.

Se veiga tamién

• Aliaga
• Chinestra