Cine d'intriga

Historia d'o zine
Tipos
Muto Sonoro Aragonés Europeu Nordamericán Latinoamericán Asiatico Africán
Cheneros
Azión Animazión Belico Comeya Decumental Esperimental Estorico Familiar Fantesía Ficzión zientifica Zine negro Independién Infantil Intriga Mosical Porno Terror Western

O zine d'intriga, tamién dito de suspenso u con l'anglizismo thriller, ye a denominación usata ta un amplo chenero zinematografico, que abraca sozcheneros diferens que a ormino s'acaballan, e que per necso d'unión tienen una trama con elementos e claus caracteristicos, a resoluzión d'os cuals mantién en suspenso lo espectador.

As zintas d'intriga comparten a ormino un ritmo rapedo, con acción freqüent y, en muitos casos, con protagonistas destinatos a trebullar es procheutos de billanos més poderosos u dar fin a conflictos importans. D'entre es recursos que gosan a apareixer, ibi ha suspenso, bayos falsos ta despistar o espectador e finals irresueltos ta futuras continazions.

O guión de muitas d'istas zintas gosa a estar l'adaptazión de bela obra literaria d'as tamién ditas nobelas d'intriga u de suspenso.

Sozcheneros

No puet fablar-se d'una dibisión clara d'as zintas d'intriga en sozcheneros, si bien, seguntes os elementos d'altros cheneros que i apareixen, a menuto pueden encaixar-sen, d'entre altros, en os siguiens estallamientos:

• Zintas d'espías, en as cualas o protagonista gosa a estar un achén d'o gubierno que ha d'acometer azions biolentas contra un altro gubierno u organizazión. En son bels ixemplos: The 39 Steps (Os 39 escalerons), d'Alfred Hitchcock; The Manchurian Candidate (O candidato de Manchuria), de John Frankenheimer; The Spy Who Came in from the Cold (O espía surtito d'o fredo), de Martin Ritt; u Spy Game (Chuego d'espías), de Tony Scott.
• Zintas d'intriga psicolochica, en as cualas ye tan u més importán o conflicto mental e emozional que no l'azión, si bien per un regular a resoluzión a la fin ye biolenta. En son bels ixemplos: Abre los ojos (Ubre os güellos), d'Alejandro Amenábar; u Memento (Recordatorio), de Christopher Nolan.
• Zintas d'intriga terrorifica, diferens d'as zintas de terror en que, més que no los elementos u feguras de terror, o que i prima ye la trama de suspenso. En son ixemplos: Psycho (Sicosis), d'Alfred Hitchcock; The Collector (O Coleczionista), de William Wyler; u Saw, de James Wan.
• Cintas d'intriga politica, en que o protagonista aduya a sostener o suyo Gubierno contra una conspiración. A sobent, as peliculas se basan en libros u best-sellers. Bels ixemplos son Seven Days in May, de John Frankenheimer, basata en un libro de Fletcher Knebel, u Chacal, de Fred Zinnemann, basata en una nobela de Frederick Forsyth.

Manimenos, ye difízil d'establir una berdadera buega entre cheneros. Asinas, a mayoría de zintas combinan una serie d'elementos de cheneros diferens. Per ixemplo, o filme Seven, de David Fincher, ye una zinta d'intriga con elementos sicolochicos, poliziaco-criminals e de terror.

D'entre os muitos directors con obras en iste chenero, en descolla lo britanico Alfred Hitchcock, qui ha rezebito en ocasions a embotata de "chenio (u mago) d'o suspenso".