Aragonés grausino

L'aragones grausino ye a parla local aragonesa que se charra en Graus (Uesca). Ye una d'as variedatz d'o baixorribagorzano millor conoxitas.

Fonetica

Tot y que predomina a diftongación d'as E y O curtas latinas, como ye normal en aragonés, bi ha casos de no diftongación, como en atras localidatz d'a Baixa Ribagorza occidental:

• ben, pedra, den, peu
• coba, bou

Como ye normal en baixorribagorzano os diftongos -ie- d'o sufixo -iello s'han simplificato en -illo:

• ixartillo, armilla, manimenos se conserva maciello.

Veyemos -o final pero ye fácil que siga recompuesta, porque se troba en casos que l'aragonés cheneral no en tiene.

• aviento, aiguazo, espantallo, anyo
• mano

Manimenos se pierde en bells casos dezaga -ll-, seguindo una tendencia común con o catalán que no se troba guaire en aragonés:

• batall, corcoll

A -y- d'a epentesi antihiatica se conserva en sayeta.

Encara que a F- inicial se conserva, bi ha muitos castellanismos foneticos:

• abllá, iel, hígado, hornillos

Encara que a Ch- inicial se conserva, bi ha muitos castellanismos foneticos:

• juebes ("chueus"), jodías ("chodigas"), jarra ("charra").

Bi ha poquetz eixemplos de conservación d'as oclusivas xordas intervocalicas latinas:

• crepa, batallá, batall, mallata, trucadó

A -x- se conserva bien, y como ye normal en ribagorzano ye acompanyata d'una i:

• un coixo baixaba por una baixada con un faixo de buixos

A x inicial ye acompanyata d'una i-, como en belsetán y chistabín:

• ixambre, ixada, ixolomá, ixafegá

A -ll- que vien d'os grupos -LY-, -C'L-, -G'L-, ecetra...se conserva en muitos casos, pero tamién trobamos asobén castellanismos foneticos:

• bieja, cogé, consejo, muertijuelo, cejas

A -it- que provién d'os grupos latins -CT-, -ULT- se conserva mal, y abundan os castellanismos foneticos:

• mucho, cochilla, escuchá
• ocho, leche, noches, fecho, encara que bi ha bell testimonio de fei (forma baixorribagorzana de feito).

Como bi ha dobletz de formas chenuinas y castellanizatas, bi ha casos de rearagonesización incorrecta, (dende o punto de vista d'os que no reconoixen l'aragonés, hiperdialectalismo):

• dixá/dejá, treballá/trabajá
• muixar en quenta de mullar

Morfolochía

L'articlo en os zaguers anyos coincide con o castellán, pero ye domentato l'emplego antigo de lo, es, y a. Puede contrayer-se con a preposición por: pol camino, pola pllaza.

L'emplego de tot se reduce a quan va dezaga de l'infinitivo, en os atros casos se diz to, y 'to puede emplegarse pa totz os cheners y numers:

• te lo voi a 'spllicá tot
• to la semana, to las cosas.

O pronombre presonal ellos de l'aragonés cheneral ye en grausino els, ye analochico de él.

Bi ha verbos que en grausino y en catalán son d'a conchugación en -ir y en castellán en -er:

• cosí, atreví, chenerals en aragonés.
• tení, querí que contrastan con l'aragonés cheneral tener, querer.

Bi ha muitos infinitivos d'a conchugación en -ar transformatos en -iar:

• obriá, mezcliá, femiá, propulsiá

Bi ha manca de diftongación en as formas rizotonicas de bells verbos, por analochía, feito común en baixorribagorzano:

• Tos rogo, Mos recorda.

O diminutivo -et a vegatas pierde a -t final:

• barranquet, balsonet
• coralé, brazolé, banqué

Lexico

O lexico catalán representa dica un 4 %:

• asquena, patamoll, filosa, sillón

Bi ha palabras tipicas de Graus y redolada:

• mirondiá, rafollada, susoído, torán

Pero cada vegata son más comuns os castellanismos, tanto os foneticos (que ya en hemos charrato), como os lexicos.

Enrastres externos

• Dizionario Grausín.
• Poemas en grausino de Luisón de Fierro

Variedaz orientals de l'aragonés
Altorribagorzano (Benasqués) | Chistabín | Fovano | Meyorribagorzano (incluindo o campés) | Baixorribagorzano (incluindo o foncense, estadillano y grausino)