La Penilla

A Peniella (en castellano y oficialment «Lapenilla») ye un lugar aragonés d'o municipio d'A Fueva, en a comarca d'o Sobrarbe y a provincia de Uesca. Actualment ye despoblau.

Se troba en una altura menuda, como cerro d'as estribacions meridionals d'a sierra d'o Turón, en a val d'a Cinca y, en l'actualidat, chunto a la ribera de l'entibo de Lo Grau. Fa parte d'a cuenca d'o barranco de Clamosa (significativament, tamién dito «de A Peniella»), en a ripa cuentra d'á on ye Clamosa. Fayó parte d'o municipio de Clamosa dica l'absorción en A Fueva en a decada de 1960, conseqüencia d'a total despoblación d'os dos nuclios más grans que en feban parte, Clamosa y a propia Peniella.

A Peniella ye o zaguer nuclio en a comarca d'o Sobrarbe por o sud, respective a lo corso d'o río Cinca, pus a 1 kilometro más auguas t'abaixo d'o lugare o río pasa a estar a muga d'entre o Semontano (Mipanas) y a Ribagorza, por debant de l'aldeya de Pui de Cinca. L'acceso se fa posible por una pista asfaltada que naixe en o lateral d'a carretera local HU-V-6441 de Graus ta Troncedo en pasando por Pano.

Como muitos altros lugars de l'Alto Aragón, A Peniella pareix que presenta una estructura defensiva que posiblement se remonta a la Edat Meya. En o cabo d'alto d'o lugar, a 670 metros d'altaria, se troba un palacio u casal fuerte que recibe o nombre de Casa O Sinyor, que en chunto con a ilesia ye un d'os atractivos d'o lugar, anque en l'actualidat se troba en runas.

Fiestas

• 6 de chinero, fiesta d'hibierno, en celebración d'a Epifanía de Betlem.
• Lunes de Pasqua, romería t'a ermita de Sant Martín.
• 13 d'agosto, Fiesta Mayor, fendo-le honras a Sant Hipolito.