Wikipedia:Aduya

Aduya

Contenitos de l'aduya de Biquipedia

Qué ye a Biquipedia

La Biquipedia ye una enciclopedia libre, de gufanya, que se ye creyando en internet por usuarios de tot lo mundo. L'ochetivo ye que cualsiquier presona tienga acceso a lo conoximento humano de traza libre e gratuita. Se construye con la colaboración desinteresada d'os suyos usuarios. Ye decir, que tu mesmo, en iste mesmo inte, puez creyar un articlo u cambear-lo ta correchir-lo u enamplar-lo. Contino, t'esplicamos cómo.

Qué contenitos puedo escribir en Biquipedia

Puez escribir-ie los tuyos propios contenitos, u bien copiar-los u traducir-los dende lo dominio publico, u dende cualsiquier atra fuent libre (p. ex., las edicions d'a Wikipedia en atras luengas). Pero para cuenta que muitas d'as pachinas d'o rete no son fuents libres. No copies en biquipedia material con copyright!. Igual si los contenitos son tuyos como si los has copiato d'una fuent libre, en publicar-lo en biquipedia, atros usuarios pueden correchir-los, cambiar-los u destribuyir-los librement.

Prou que totz los articlos que se faigan han d'estar enciclopedicos y relebants (biquipedia no ye un diccionario ni un repositorio de testos, ta ixo ya en i hai atros procheutos). Tamién has de respetar cas politicas de biquipedia sobre lo Punto de Vista Neutral.

Cómo se creya un articlo nuevo

I hai cuantas trazas de creyar un articlo nuevo:

• Si mirando-te belatro articlo trobas un binclo en royo, puez punchar-lo, e t'amaneixerá una nueva pachina con un editor de testo an que puez pretar á escribir. Cuan remates d'escribir, punchas Alzar pachina, que ye debaxo d'a finestra d'o editor de testo, á la cucha, e ya has creyato una pachina d'a futura enciclopedia n'aragonés.

• Si quiers creyar un articlo de nuevas y no tiens garra binclo royo, la traza más simpla ye escribir lo nombre de l'articlo (como quieras que amaneixca tetulato, con os suyos acentos y mayusclas) en lo buscador que amaneixe á la tuya cucha, y punchar en lo botón Ir-ie. Si no bi ye ya en la Biquipedia, amaneixerá un binclo royo con lo testo que has mirato. Si lo punchas, te saldrá una nueva pachina an que podrás prencipiar á escribir ixe articlo.

• Tamién puez escribir dreitament en la barra d'adrezas d'o tuyo navegador lo nombre d'a nueba pachina. Asinas, si quereses escribir un articlo sobre Pedrón de casa Fustero d'A Fueba, caldría que i escribises

http://an.wikipedia.org/wiki/Pedrón de casa Fustero d'A Fueba 

en a barra d'adrezas d'o tuyo nabegador. Decamín s'ubrirá una nueva pachina con una caixa d'edición an que podrás prencipiar á escribir.

Remera que dica que no punches en lo botón Alzar pachina, la pachina no quedará almadacenada en lo sistema.

Cómo cambiar (editar) un articlo que ya esiste

Ta cambiar, correchir u enamplar una pachina que ya esiste, nomás te cal punchar lo botón Editar que ye en lo cobalto d'a pachina, y ya puez modificar, correchir u enamplar o que quieras. Ta que la pachina quede almadacenada has de punchar en lo botón "Alzar pachina" que sale debaixo d'a caixa de testo. Ye bien fácil! Si quiers estar seguro de que lo has feito bien, puez punchar antes en "Previsualizar".

Tampoco no t'ha de fer miedo d'estorbar bella cosa. La tecnolochía wiki fa que se puedan desfer totz los cambios que faigas, asinas que no te'n faigas, puez prencipiar á colaborar cuan t'agane. Manimenos, si quiers fer en primerías bellas prebatinas, puez ir t'a nuestra pachina de prebatinas.

Contino trobarás aduya sobre cómo dar formato á un testo. Manimenos, en los primers articlos que fagas, no pasa cosa si lo formato no ye correuto de tot. Belatro biquipedista li dará formato y asinas podrás aprender millor á fer-lo.

Cómo dar formato á lo testo d'un articlo

Los testos en negreta, los títols de cabecera, las cursivas... s'han de fer con lo codigo previsto ta cadagún d'ixos estilos. Lo más fácil ye emplegar lo menú que amaneix en lo cobalto d'a caixa d'edición. Ixe menú tamién permite ficar imachens, binclos ta webs esternos u á articlos d'a Biquipedia, u trestallar lo testo con linias horizontals.

Pero lo millor y más rapido ye que prencipies á escribir dreitament lo codigo. Asinas la negreta se fa abracando lo testo á destacar entre tres apostrofes. La cursiva se fa con dos apostrofes y las cabeceras con grupos de dos u tres signos =.

'''Iste testo saldrá en negreta'''
''Iste en cursiva''
==Iste ye un títol muit gran==
===Iste ye un títol subordinato á l'anterior===
====E iste ye subordinato á l'anterior==== 

Ta trestallar paragrafos, no ye prou con pretar la tecla "enter" una begada. Has de fer-lo dos begadas. Y si quiers que o parragrafo tienga sangría has de prencipiar la frase con dos puntos (:), (::) ó (:::).

:Ista linia tien sangría.
::Ista ye más desplazada.
:::Más...
::::Dica aón se puet plegar? :-)>

Cómo meter los binclos

Lo codigo ta fer binclos ye lo que más ferás servir, y ascape te i farás. Un binclo ta un articlo que ya esiste en la Biquipedia se fa abracando con dos gafez o testo con lo títol esacto de l'articlo. Si quiers fer lo binclo pero lo títol no cuadra en lo testo, tamién puez er-lo. Por exemplo, si quiers decir que belun ye francés, y quiers enlazar o chentilicio con l'articlo sobre Francia, lo puez fer asinas:

[[Francia|francés]]. D'ista traza, en lo testo amaneixe nomás lo chentilicio, pero si se puncha en él con lo ratet,
se'n ba ta l'articlo sobre lo país.

Lo procedimiento ta un binclo esterno ye similar, pero abracando con gafez simples l'adreza URL y lo testo esplicativo.

Asina: [http://an.wikipedia.org Biquipedia en aragonés]

Y ya lo tiens!. Cuan lo tiengas tot feito, nomás has de punchar lo botón de Alzar pachina. Si no i yes guaire seguro, d'haber-lo feito bien, puez fer-le un golladeta punchando en Previsualizar.

Belatras custions d'interés

• Categorías.

En Biquipedia ye muit important la categorización d'os articlos. Malas que remates d'escribir lo tuyo articlo, has de mirar cuála u cuálas son las categorías más adecuadas. Si no esisten, puez creyar-la(s). Ye de buen fer, nomás has d'escribir, a la fin d'o tuyo testo, lo siguient codigo:

[[Categoría:la que siga]]

Si no ye creyada, amaneixerá lo nombre d'a categoría en royo. Puncha-lo, y en la caixa de testo que amaneix escribe lo codigo d'una categoría superior que ya esista. Por exemplo:

[[Categoría:Colombofilia]]

Si no esistise ixa categoría, podría seguir lo binclo y te lebaría ta una caixa d'edición an que podría asociar-lo ta una u cuantas categorías superiors:

[[Categoría:Aficions]]
[[Categoría:Paloma]]

• Interwikis.

Tamién son á saber qué importants las interwikis. Son los binclos ta lo mesmo articlo en las Wikipedias en atras luengas. Lo codigo ta fer interwikis ye como lo que se fa serbir ta fer binclos internos, pero con lo codigo d'a luenga en custión. Istos interwikis se gosan meter siempre á la fin d'o testo de l'articlo, y se faría asinas

[[ca:Asociación Colombófila Pixueta]]   (Ta o catalán)
[[es:Asociación Colombófila Pixueta]]   (Ta o castellán)
[[scn:Asociación Colombófila Pixueta]]  (Ta o sizilián)

Por un regular, lo más fácil ye copiar la lista completa d'interwikis editando l'articlo correspondient en las Wikipedias más grans (en anglés, alemán, español) y apegando-la en lo tuyo articlo.

• Títols y endreceras.

Un problema que se troba á sobén ye cuál ha d'estar lo nombre de l'articlo. Los dandalos arredol d'iste tema se pueden discutir en la Tabierna u en las seccions d'Uso d'a luenga. De todas trazas, normalment trobarás cuantos posibles títols balidos ta un articlo. Asinas, Diana Spencer bien pudiera estar Lady Di. Tamién podremos dudar entre las diferents variants lexicas y/u foneticas d'o nombre: por exemplo can u cocho, etc. La solución ye reendrezar una d'ellas enta lo que se considere que ha d'estar lo títol prencipal. Asinas, si un escribe lo nombre de Lady Di en lo buscador, irá dreitament ta l'articlo de Diana Spencer. Las endreceras son tamién de buen fer. Nomás has de creyar l'articlo ta lo nuevo títol y escribir en la caixa d'edición lo siguient codigo:

#REDIRECT:[[o que siga]]
Siguindo lo exemplo, en lo nuevo articlo tetulato Lady Di escribiremos:
#REDIRECT:[[Diana Spencer]]

Dimpués punchas en Alzar pachina y prou.

• Imáchens

Puez ficar en un articlo cualsiquier imachen que siga en lo dominio publico, que no tienga dreitos d'autor, u tamién una imachen d'a que tu sigas l'autor y quieras meter en lo dominio publico. Puez cargar-las en biquipedia, fendo servir la opción cargar archibo. Manimenos, lo millor y más fácil ye treballar con lo reposte d'imáchens libres Commons. Astí puez trobar asabelas imáchens y debuxos ta ilustrar lo tuyo articlo. Tú tamién puez cargar-ie imáchens y/u debuxos que aigas feito tu mesmo. L'abantalla ye que asinas podrán emplegar-las en todas las wikis. La traza d'usar las imáchens de Commons ye la mesma que si las imáchens son cargadas en la biquipedia. S'ha d'emplegar lo siguient formato

[[Imachen:exemplo.jpg]] 

• Pachinas de descusión

I hai prous puestos an que puez espresar las tuyas opinions sobre los contenitos, lo formato, la luenga u lo estilo d'un articlo, asinas como comunicar-te con atros usuarios.

Totz los articlos tienen una pachina de descusión, an que puez fer comentarios sobre ixe articlo. La traza más fácil de ir ta una descusión d'articlo ye indo ta l'articlo y punchando en la pestaña que diz "descusión". Tamién puez meter dreitament en lo tuyo navegador lo nombre d'a pachina de descusión. Asinas, la pachina: http://an.wikipedia.org/wiki/Idioma alemán tien la suya descusión en http://an.wikipedia.org/wiki/Descusión:Idioma alemán.

Si quiers decir-le bella cosa á un usuario, puez fer-lo en la suya pachina de descusión.

La Tabierna ye un puesto ta discutir sobre temas chenerals de biquipedia.

Acorda-te que no cal siñar en las edizions d'articlos, pero sí cuan escribas bella cosa en una pachina de descusión. Lo puez fer de traza rapeda escribindo tres tildes ~~~ (saldrá nomás lo tuyo nombre d'usuario) u cuatro tildes (recomendable) ~~~~ (saldrá lo tuyo nombre d'usuario y la calendata d'edición).

Más información

La tabierna ye pensada ta que los usuarios puedan charrar sobre lo procheuto y preguntar y resolber dandalos, los unos á los atros.

En la recopilación de Preguntas Frecuents (FAQ) de Biquipedia puez trobar una lista de respuestas á preguntas frecuents ta nuevos usuarios.

Si nunca no has participato en una Wikipedia, puez besitar l'ayuda en la Wikipedia en español u en anglés, á on que puez aprender tot lo que amenistes ta saber cómo construir una Wikipedia en la tuya luenga. Si no trobas la información que rechiras, puez preguntar en a Tabierna, á on que de seguras, bel usuario se mirará d'aduyar-te.