Eslovenos

Os eslobens son os abitants mayoritarios d'Eslobenia e forman una minoría important en Carintia (Austria) e en zonas mugants d'Italia. Charran una luenga eslaba meridional, o eslobén e son catolicos.

Istoria

Os eslabos s'establixen en l'actual Eslobenia en o sieglo VII e cuan os abaros dominaban Panonia se posan baxo protezión d’os bayoarios. Carlemaño adhibió o territorio d'os bayobarios e tamién d'os eslobens a lo Imperio, a l'egual que se desbinió cuan se formó o Sacre Imperio enta o sieglo X. A introduzión d'o feudalismo carolinchio desconchuntó e desfazió a organizazión tribal d'os bayobarios e os eslobens.

A cristianizazión se fa dende o patriarcato d'Aquilea e dende l'arzebispato de Salzburgo.

A fins d'o sieglo XIII os Habsburgo prenen o control d'o territorio d'os eslobens: Carniola, Estiria, Carintia e zonas de Gorizia e Trieste. Encara que i abió protestantismo, a contrarreforma remató con él. En 1805 por o tractato de Presburgo, Napolión obliga a Austria a zeder-li Istria e Dalmazia, e en 1809 por o tractato de Viena obliga a Austria a zeder-li l'Alta Carintia, Carniola, Trieste e parte de Croazia a lo sud d'o Save. Con estos territorios e Ragusa forma as Provincias Ilirias, con capital en Liubiana. En as provincias ilirias crexe a ideyolochía d'o ilirismo.

En a primera Guerra Mundial os eslobens yeran fidels a lo Imperio Austrongaro pero en mayo de 1917 l’abate Korosec ye a fabor d’a creyazión d’un estato eslabo en o Imperio. En rematar a primera guerra mundial Korosec preside un Comité nazional en Zagreb con os crobates e os serbios d’Hongría e dos meses més tarde o rei de Serbia azeuta a creyazión d’o reino de serbios, crobates e eslobens.

Hongría zede a lo nuebo reino a o destrito de Mur, abitato por eslobens, en o tratato de Trianon.

En a rechión de Klagenfurt (Alta Carintia) o 10 d'agosto de 1920 a mayoría bota por unir-se a Austria.

En o tratato de Ramallo Italia obtién Istria e un territorio abitato por 400.000 eslobens.

En a Yugoslabia d'entreguerras Eslobenia no yera una entidat autonoma pero o eslobén yera a luenga ofizial d'a banobina d'o Drave. En Istria Mussolini prebó italianizar a los eslobens.

Por un tractato o 8 de chulio de 1941 eslobenia quedó dibidita entre Alemanya e Italia, e o destrito de Mur pasó ta Hongría. Cuan en setiembre de 1943 capituló Italia o sud d’Eslobenia fue almenistrato por Alemanya.

En 1946 Eslobenia esdebinió una republica popular en a Federazión Yugoslaba, recupera o destrito de Mur e se creya atra muga con Italia (tractato de París de 1947) que adchudica a Eslobenia a bal alta d’o Isonzo e dibide a ziudat de Gorizia. Trieste e a suya redolata son declaratos territorio libre e no se resuelbe a suya situazión dica 1954. Una minoría eslobenia d’unas 50.000 presonas queda en Italia.

En a Federazión Yugoslabia, Eslobenia yera a zona més rica, con mayor ran de bida e que contribuiba més a l’aduya federal a rechions menos desembolicatas. En a decada de 1980 i eba tensión entre Liubliana e Belgrado e en chinero de 1989 se creya en partito politico no comunista (o primero en os países comunistas), e dimpués atros. En abril de 1990 i abió eslezions e ganó una coalizión de zentro-dreita, pero fue esleito president o comunista Milan Kuncan. En abiento de 1990 o 95 % d’os eslobens botoron a fabor d’a independenzia.

Eslobenia independient

O 25 de chunio de 1991 fue proclamata a independenzia, o exerzito yugoslabo interbinió pero no podió fer cosa e se retiró en berano. Alemanya reconoxió Eslobenia o 23 d'abiento de 1991 e os atros miembros d’a CEE o 15 de chinero de 1992. Eslobenia esdebinió miembro d'a ONU en abril. Actualment Eslobenia tien un rechimen democratico como cualsiquier país d'Europa Ozidental e Zentral.

Bibliografía

• André Sellier, Jean Sellier ATLAS DE LOS PUEBLOS DE EUROPA CENTRAL. Acento editorial.