Tengrianismo

Plantilla:Grafía 87 O tengrianismo ye a relichión tradizional d'os pueblos turqueses enantes que se combirtieran a las relichions d'as soziedaz sedentarias a las que imbadiban u con las que s'aliaban, prenzipalment a relichión islamica. O tengrianismo prene o nombre por o dios zeleste Tengri.

Os pueblos turqueses, a l'egual que os mongols e tunguses, como ye propio d'os pastors nomadas, zentraban lur relichión en un dios zeleste, personificazión d'o mesmo zielo. Tengri ye un dios con carauter luminoso, meteorico e sanzionador.

Bels autors relazionan o termin Tengri u Tangara con o chino T'ien, literalment "zielo", e igualment se fa serbir pa dizir a lo dios que personifica o zielo. A deidat zeleste talment fue introduzita en China por a clase guerrera, feudal e metalurchica que prenió o poder con a dinastía Chou, desplazando o culto d'a Parella Dibina neolitica. Tamién quieren relazionar tengri con o sumerio dingir (nombre chenerico pa os dioses) e con o polinesio Tangaroa.

Este dios supremo abitaba o seteno zielo, e teneba una serie de fillos, (os fillos de Tengri) que rechiban cadagún d'os siet zielos.

O culto a los muertos u debantpasatos yera muito present e se baloraba a suya asistenzia en a caza u en a guerra. Os turqueses atribuiban a la rezitazión de bels cantos epicos un poder machico pa ebocar a los debantpasatos. Talment prenioron d'os pueblos indoeuropeus conzeutos arredol d'o caballo, os dioses-chinet, a muerte e exerzitos de revenenants.

No manca o carauter totemico de bels animals. Muitas tribus unas e turquesas teneban a lo lupo u a bellas razas de cans como animals totemicos. O etnonimo d'os nogais significa en mongol "can". En os yacuz yera important o culto a l'onso, que puet estar un erenzio d'os pueblos paleosiberians con os que os turqueses estioron en contauto. Plantilla:Destacato