Jazz

Plantilla:Grafía 87 Plantilla:Chenero mosical O jazz ye un chenero mosical, orichinario de Nueba Orleans (Loisiana, Estatos Unitos d'America), a on se mezcla una ritmica propia d'os negros nordamericans (blues, prenzipalment, pero tamién as work songs, o ragtime, as cantas d'os "Minstrels") con una estrumentazión e una timbrica chenuinas d'os grupos de carrera (trompeta, corneta, clarinet, trombón, tuba, baxo, bombo e platiellos).

Cuan istos conchuntos s'estabilizoron, sustituyoron a tuba por o contrabaxo, o bombo e os platiellos por a batería e se i adibió lo piano. Ista yera la formazión d'a Original Dixieland Jazz Band, un grupo blanco que emplegó a palabra jazz por primera begata, en 1917. Tanto por repertorio como por estrumentazión, armonia e más que más por a improbisazión (base caracteristica d'o jazz) s'ha eboluzionato dica plegar, en os años 80 e 90 d'o sieglo XX, a una fusión d'estilos muit dibersos. Asinas, chunto con cantas populars u d'operetas e mosicals de Broadway, o jazz encorporó, a partir de 1920, composizions pensatas espezificament ta estar entrepitatas por istos conchuntos.

Un grupo de Jazz, autuando en un local

Con o estilo dito "Chicago" - u hot jazz - s'enriquezioron as improbisazions e s'encorpororon nuebos estrumentos como lo sacsofón (tenor e alto, prenzipalment), a guitarra e o briolín. Atros estrumentos que s'han ito encorporando, estioron o bibrafón, os sacsofons baritons e soprano, a flauta, l'organo e esferents tipos de percusión (conga u tumbadora, bongos). Asi mesmo, os cantaires, tan importants ya dende os inizios d'o blues, adotoron o lenguache nuebo e dende os años 30 s'encorpororon a lo jazz.

Unatra caracteristica propia d'iste chenero son as jam sessions, trobatas de mosicos a la fin d'os conziertos, en que toz os estrumentistas improbisan a partir d'una melodía. Entre finals d'os años 1920 e finals de 1945 trunfa o estilo dito swing, entrepritato por grans orquestas (big bands) de doze u catorze estrumentistas.

Dimpués d'a II Guerra Mundial penzipia o esclatito d'o be bop que reboluzionó as formas d'improbisar, amanando-las cuasi a lo banguardismo, e tamién o tipo de sonoridat. O bop ye a base d'o que se conexe, a ormino, como modern jazz, en oposizión a lo mainstream, más clasico, que ha continato entrepritando-se sin d'interrupzión. Entre os deribatos d'o bop trobamos o cool, tamién o estilo west coast, o hard bop, o third stream e, finalment, o free jazz, en que no se sigue dengún patrón melodico ni armonico, e nomás importa a timbrica, a esperimentazión con os estrumentos e a discontinuidat ritmica. Plantilla:Destacato