Mortalera de Boston

Grabato propagandistico d'epoca d'a Mortalera de Boston, feito por Paul Revere.

Se conoix con o nombre de Mortalera de Boston (The Boston Massacre en anglés) á bells sucesos escaicitos o 5 de marzo de 1770 en a ciudat de Boston, que alavez feba parte d'a colonia britanica de Massachusetts (hue uno d'os estatos d'Estatos Unitos). Os feitos estioron uno mas d'os episodios en a confrontación entre as colonias britanicas en America d'o Norte y a suya potencia colonial, y que rematoron en a Guerra d'Independencia d'os Estatos Unitos y en a independencia estatounitense.

A secuencia d'os feitos prencipió o 22 de febrero de 1770, quan morió un adolescent, Christopher Seider, por disparos britanicos. As manifestacions d'os colons en protesta continoron dica o 5 de marzo, quan os soldatos d'o Eixercito britanico disparoron cuentra os manifestants en King Street, fendo un total de 5 muertos, feito que fació que os bostonians encara tenesen mas inquina cuentra os britanicos.

Encara que nomás bi habió 5 muertos, Paul Revere fació uso propagandistico intensivo d'os escaicimientos por meyo de grabatos que charraban d'a mortalera sangrienta de King Street, encara que os grabatos á mas no responeban á la reyalidat (uno d'os muertos yera de raza negra, y amanix blanco en o grabato, á mas que en o grabato aparix nieu en as carreras).

Dimpués d'os feitos, os britanicos facioron un chudicio melitar cuentra o capitán Thomas Preston, qui mandaba á os soldatos (a suya esfensa en o chudicio la fació John Adams, futuro president d'Estatos Unitos). Por a sentencia, fuoron forachitatos d'o Eixercito britanico. Sin d'embargo, iste episodio se grabó en a conciencia estatounitense, fendo d'el uno d'os feitos mas conmemoratos d'a Guerra d'Independencia d'os Estatos Unitos y celebrando-se como fiesta nacional dica finals d'o sieglo XVIII.