Escuelas Pías

A Escuela Pía de Sarrià, en Barcelona (Catalunya).

Escuela Pía en Pontevedra (Archentina).

A orden d'as Escuelas Pías u Orden d'os Clericos Regulars Pobres d'a Mai de Dios d'as Escuelas Pías estió establita en Roma en l'año 1597 por o sazerdote aragonés San Chusep de Calasanz. Os suyos miembros se conoxen como Escolapios.
Se fundoron con l'obchetibo de dar una educazión alazetata en a fe y en as letras á os ninos pobres y albandonatos. Os mayestros yeran os propios Pais Escolapios.
Güe, as "Escuelas Pías" son espanditas por tot o mundo.

Istoria

A primer "Escuela Pía" fue fundata en 1597 en a "Parroquia de Santa Dorotea", en o bico romano de Trastevere, por San Chusep de Calasanz. En ella se ubrió a primer Escuela popular gratuita de Europa. Dende ixe inte, l'alunnalla crexió rapedament.
Un año dimpués, o río Tíber se sobrexió, allerando as casas d'os pobres y as dos cambretas an que feban as clases, quedando tot estricallato.
Poco dimpués d'ista esferra morió Mosen Antonio Brandini (o parroco de Santa Dorotea) y o nuebo parroco no querió que continase a escuela en a parroquia. San Chusep de Calasanz abió de continar a suya obra con os ninos pobres de Roma, primero en dos casetas amán d'a Fonda d'o Paradiso y dimpués en o Palazio Vestri. En 1601 l'alunnalla blinca d'os 500 escolanos. Cuan o papa Climén VIII conoxe a obra d'estas escuelas, queda impresionato y se fa cargo dica a suya muerte de pagar o loguero d'a escuela.
San Chusep de Calasanz dezide que o suyo colechio bi abrá "orazión contina" dende o maitin dica a tarde en o teimpo de clase. Chusep de Calasanz acompañaba á os ninos dica casa suya dimpués d'as clases, y organizaba á os mayestros aconsellando-les reunir-sen una begada por semana ta tratar de temas d'o colechio. Entre os colaboradors d'a Escuela bi yera o Pai Dragonnetti, gran latinista. En 1602 bi eba 700 alumnos, y abioron de mudar-sen ta o "Edifizio Mannini".

D'astí naxió a ideya d'establir una congregazión relichiosa de sazerdotes que estió aprebata por Pablo V en 1617. O fundador estió nomenato Superior y redautó as Constituzions que estioron emologatas en 1622 por o papa Gregorio XV, qui li atorgó o caráuter d'orden relichioso mendicant. Autualment bi ha comunidaz escolapias en Europa, America, Asia y Africa.

As Escuelas Pías en Aragón

Antiparte d'a relazión espezial con Aragón, como país an que naxió o fundador d'a Orden, as Escuelas Pías son estatas muito presents en Aragón. O primer colechio escolapio establito en España estió o de Balbastro, en 1677. Dimpués s'ubrioron escuelas por tot o Reino: Benabarre (1681 y 1729), Peralta de la Sal (1695), Daroca (1728), Alcañiz (1729), Zaragoza (1732), Albarrazín (1732), Chaca (1735) y Tamarit (1741). En 1742 se creyó a provincia escolapia d'Aragón, a más antiga d'a Peninsula Iberica, que encluyiba tamién bellas comunidaz en os reinos de Castiella y Valencia y as posteriors fundazions en o País Basco y Archentina. Dimpués se creyoron os colechios de Sos (1760), Albelda y Fraga (1827), Casp (1858) y Molina (1867). Con a espansión territorial, s'esgalloron d'a Provincia d'Aragón cuatro nuebas provincias: Castiella (1753), Valencia (1826), Basconia (1933) y Archentina (1964). Autualment, os escolapios d'Aragón treballan tamién en A Riocha, Soria, Nueba York, Camerún y Puerto Rico. En Peralta de la Sal se i troba o nobiziato, en a mesma casa an que naxió y crexió Chusep de Calasanz.

Ideyolochía

A ideyolochía d'as Escuelas Pías se resume en o suyo lema: "Piedat y Letras", que deixa beyer os prenzipals obchetibos de San Chusep de Calasanz cuan establió esta nueba obra.

Mira que o nino quite o suyo masimo potenzial inteleutual y espiritual á trabiés d'una educazión de calidat y d'una espiritualidat alazetata en a moral d'a Ilesia.

Se beiga tamién

• Escolapias
• San Chusep de Calasanz

Binclos esternos

• Pachina Ofizial d'as Escuelas Pías
• Pachina Ofizial d'as Escuelas Pías d'Aragón