Emprenyatura

Una muller preñata.

A empreñatura preñau, preño u chestazión se refiere á lo prozeso posterior á la fecundazión d'un obulo por o espermatozoide, por o cualo se dembolica un nuebo indibiduo d'a espezie aintro d'o cuerpo d'a mai, dica l'inte d'o parto; fa referenzia á iste periodo de tiempo entre a fecundazión e o parto. Encluye toz os prozesos fisiolochicos de creximiento e desembolique d'o feto en o interior de l'utero materno, asinas como os importants cambeyos fisiolochicos, metabolicos e morfolochicos que se produzen en a muller ta protecher, nutrir e premitir o desembolique d'o feto, como a interrupzión d'os ziclos menstruals, u l'aumento d'a mida d'as mamas ta preparar a lactanzia.

Tienen empreñatura toz os mamifers e, por tanto tamién os sers umans. En a espezie umana as chestazions gosan estar unicas, encara que pueden produzir-se empreñaturas moltiples. L'aplicazión de tecnicas de reproduzión asistita ye fendo puyar a inzidenzia d'empreñaturas moltiples en os países desembolicatos. O secso d'o nuebo indibiduo biene determinato por una combinazión chenetica d'a parella de cromosomas secsuals, seguntes cuala sía la copia transmesa á lo espermatozoide mientres d'a meiosis.

A empreñatura umana gosa durar nueu meses u belas 40 semanas dende o primer día d'a zaguera menstruazión; u 38 dende a fecundazión (alto u baxo bels 9 meses). Se considera que a chestazión u empreñatura prenzipia chusto dimpués d'a fecundazión de l'obulo e a implantazión d'o embrión e a matriz. O primer trimestre ye l'inte de mayor riesgo d'alborto espontanio; o prenzipio d'o terzer trimestre se considera o punto de biabilidat d'o feto, aquel punto dende o cualo puet sobrebibir difuera de l'utero sin de soporte medico. L'alborto ye a entorruzión d'a empreñatura, en o lapso que ba dende a conzezión dica o prenzipio d'o naximiento, bien sía de traza boluntaria u por causas naturals u de malautía. Se diz microalborto á lo impedimento d'o desembolique d'o preembrión umán e a suya consecuent muerte.