Varsovia

Barsobia (Varsovia en grafía SLA; Warszawa en polaco) ye una ziudat polaca, capital d'o país y d'a boibodia de Mazobia.

A suya poblazión ye de 1.706.624 abitans (2008) en una superfizie de 516,90 km², con una densidat de poblazión de 3.301,65 ab/km². Con a suya aria metropolitana (Obszar Metropolitalny Warszawy), a suya superfizie ye de 6.100,43 km².

A ziudat, situata á o canto d'o río Bistula, ye á una altaria d'entre 78 y 115 metros denzima d'o ran d'a mar. Almenistratibament, ye dibidita en 18 destritos (dzielnice en polaco).

Ye a ziudat de Polonia con mayor numero d'abitans, y tamién o suyo zentro economico y cultural, con 66 zentros d'almostranza superior, encluyendo a Unibersidat de Barsobia.

Istoria

Barsobia ye a capital de Polonia dende l'año 1596, cuan o rei Segismundo III cambeyó la capital de Polonia, que enantes de la Unión de Lublin yera Kraków.

A Segunda Guerra Mundial estió desastrosa pa Barsobia, quedando arrasata á la fin de la guerra. Dende os primers días d'a guerra, o Fliegerkorps VIII d'a Luftwaffe, manato por Wolfram von Richthofen (o mesmo que eba manato o bombardeyo de Guernica por a Lechión Condor en a Guerra Zebil española) fazió bombardeyos aerios sobre Barsobia y a suya poblazión zebil, luego d'eliminar á l'abiazión polaca.

O gubierno d'ocupazión alemán conzentró a los chodigos de Barsobia e atras localidaz en un Guetto (o guetto de Barsobia), dende on dimpués los nimbiaban a Treblinka. Os zaguers chodigos que quedoron en o Guetto se subleboron sin esito dimpués que en deportasen a la mayoría. Tamién os polacos se subleboron sin esito en 1944 en a conoxita Sublebazión de Barsobia, sin rezibir aduya d'o Exerzito Royo sobietico que yera á man. Como resultato la parte biella de Barsobia quedó arrasata de tot, e fue recostruita dimpués d'a guerra.

Enrastres esternos

• Se veigan as imáchens de Commons sobre Barsobia.
• Pachina web ofizial monezipal.