Val de Tena

Ambista d'a Bal de Tena

A Val de Tena se troba en a vesant sud de lo Perineu, en a comarca de l'Alto Galligo y la trescruza o río Galligo de norte ta sud. B'ha dos entibos en o río: o de Lanuza y o de Búbal. O Estreito Closura u de Santa Elena sinyala la dentrata en a val dende a Tierra de Biescas. Ye comunicata con a val d'Osal, en o Biarn, por o puerto de lo Portalet de ra Nieu.

Os lugars d'a Val son Fornigal, Sallent de Galligo, Lanuza, Escarriella, Pandicosa, O Pueyo de Tena, Sandiniés, Tramacastiella, Piedrafita, Oz de Tena, Búbal, Saqués y Polituara.

A suya economía ye tradicionalment ganadera con bella cosa d'agricultura y actualment tamién s'alazeta en o torismo, sobre tot relacionato con a nieu, y en os recursos hidroelectricos.

Ye rodiata de monts de más de 3.000 metros, como son o pico Os Moros, Vachimanya u Os infiernos.

O chentilicio d'a val ye tensino/a, igual como lo dialecto de l'aragonés que charran os suyos habitants.

División administrativa tradicional

Dica 1836 a val se trestallaba oficialment en tres quinyons estando Sallén a unica villa y capecera d'a val:

• Quinyón de Sallén: formato por as localidatz de Sallén y Lanuza.
• Quinyón de Partacua: formato por as localidatz de Escarriella, Tramacastiella, Sandiniés, Piedrafita, Saqués y Búbal.
• Quinyón de Pandicosa: formato por as localidatz de Pandicosa, O Pueyo y Oz.

A Chunta Cheneral d'a Val de Tena yera la institución que s'encargaba d'os afers entre os distintos quinyons. A suya seu yera en as Casas d'a val, en O Pueyo, capital administrativa d'a val.

Enrastres externos

• Pachina d'a Val de Tena