Galitzia Oriental

Mapa de Ucraina on se puet localizar Galitzia oriental

Galitzia Oriental ye una rechión istorica situata en o cabo ozidental d'Ucraína, con capital en Lvov. Ha pertenexito istoricament a Polonia e Austria e os polacos formaban una parte important d'a suya poblazión dica a ocupazión sobietica que siguió a la Segunda Guerra Mundial.

Istoria

Galitzia e Volinia en a Polonia d'entreguerras

En a istoria d'Ucraína, Galitzia Oriental ocupa un puesto important. O prenzipato de Halicz, (d'on bien o nombre de Galitzia) estió refuchio d'una parte d'a elite de Kiev (clerigos, ombres de letras e comerziants) dimpués d'a embasión mongola.

Os polacos l'anecsionoron baxo o nombre de Rusia Roya, e Lvov en yera a capital. Por o primer reparto de Polonia (1772) Galitzia pasó a Austria. O mobimiento nazionalista ucrainés se desembolicó en o sieglo XIX baxo os autriacos en uns tiempos en os que en o Imperio Ruso esto yera imposible.

En 1914 i abió una ocupazión rusa temporal en a que as manifestazions de cultura ucraniana fuoron reprimitas (os rusos beyeban en Galitzia Oriental o "Piamont d'Ucraína"). Proibioron os periodicos, zarroron escuelas e deportoron ta Rusia a lo metropolitán greco-catolico.

En o periodo d'entreguerras tornó a fer parte de Polonia, pero fue adibita a la URSS en 1939 e dimpués a lo Generalgouvernement en 1941, pa dimpués ser reocupata por os sobieticos. En 1946 se produzió a represión Stalinista e a proibizión d'a ilesia uniata.