Río Aragón

O río Aragón ye un d'os grans cursos flubials d'a compleganza d'o río Ebro. A suya cuenca tien una superfizie de 8.524 km². Recorre 195 km dica plegar á l'Ebro, aportando una meya de 1.300 Hm³/año.

Naxe en o zirco glaziar d'a bal d'Astún (Uesca) á 2.050 m sobre o mar. En a cabezera reculle as auguas d'os ibons d'Escalar e de Truitas. Descurre auguas entabaxo por l'alta montaña dica plegar ta Chaca, á on as suyas auguas cambean de direzión ta enfilar-sen ta l'ueste á las tierras nabarras. A compleganza d'alimentazión d'o río Aragón tien una gran amplaria que plega á los 2.886 metros en o Pico de Collarada. En ista redolada la caita de nieu ye abundante, lo que orichina en primabera grans crexidas, atra epoca d'abenidas ye l'agüerro con as plebias.

Entre os afluyents de l'Aragón son os siguients ríos: Gas, Lubierre, Candanchú, Estarrún, Aragón Subordan, Beral, Eska, Iratí, Regal, Onsella, Zidacos e Arga.

O curso d'o río ye regulato por o entibo de Yesa, con una capacidat de 470 Hm³ d'augua que s'aprobeita ta usos agricolas a trabiés d'a canal d'as Bardenas, que dende o suyo orichen en o entibo dica a suya desembocadura en o río Galligo en Ardisa tien una largaria de 139 km.

En a compleganza de l'Aragón bi ha una gran dibersidat bechetal podendo trobar-sen espezies de diferens climas y ambiens que ban dende o pin negro, carrasca, fabo, pin royo, abet, abetoch, azirón, tremolín, fráxin, zerollera, buxo, allaga, chinipro, caxico, etc.

Desemboca en o río Ebro en a poblazión de Miraglo (Nabarra).

Enrastres esternos

• Se veigan as imáchens de Commons sobre o río Aragón.