Canal (carnicería)

Este articlo trata sobre la canal que ye una ferramienta que s'emplega en o despieze d'os animals ta consumo. Ta altros emplegos d'o termino canal se beiga Canal (desambigazión).

Una canal tradizional, feita de buxo.

Una canal u canala (á menut tamién per confusión se'n diz canaula) ye una lata de fusta tallata con una fendetura en o costato inferior e dos forquetons en os estremos, que feban forma de cono (u arpón), que s'emplegaba tradizionalment ta penchar berticalment con ella las bestias que s'acababan de matar en boca t'abaixo per o tendón d'Aquiles (patas zagueras), ta poder-be-las obrir en canal e limpiar-las d'as tripas e biszeras e tamién ta que las magras s'ixequen ta fora (drenen) d'a sangre en ixa posizión. Este ye un causo de nombre de ferramienta que demana dreitamente d'a funzión ta que s'emplega.

A fendetura zentral serbiba ta penchar en equilibrio la pieza, con un ganche d'un fuste (biga) d'o techo u cosa ansinas, u cualques begatas ligata con cuerda. Os forquetons d'os estremos se feban atrabesar a mimbrana fineta que queda debaixo d'o tendón d'Aquiles cuan éste se fa debantar, e per astí se i penchaba l'animal. A mida d'as canals baría aprosimadament d'entre os 35 e 80 zentimetros de lonchitut, e dos u tres didos de diametro en a par més groixuta.

Se beiga tamién

• Canaula / Canabla
• Gotiel
• Lata