Fase (materia)

Un chicot troz de chelo d'argón eschelando-se ascape, beyendo-se-ie á más a transizión de solido á gas.

En fesica, una fase ye una rechión d'o espazio (un sistema termodinamico), á trabiés d'a cuala totas as propiedaz fesicas d'un material son esenzialment uniformes. Exemplos de propiedaz fesicas son a densidat, endize de refrazión, e composizión quimica. Una descripzión simpla ye que una fase ye una rechión de material que ye quimicament uniforme, fesicament diferent e (á sobent) mecanicament deseparable. En un sistema formato por chelo e augua en una charra de bidre, os cubez de chelo son una fase, l'augua ye una segunda fase e l'aire umedo arredol de l'augua ye una terzera fase, O bidre d'a charra ye atra fase deseparata.

O termín fase s'emplega á ormino como sinonimo d'estato d'a materia. Tamién, o termín fase gosa referir-se á un conchunto d'estatos en equilibrio definitos, en termins de bariables d'estato como presión e temperatura, por una muga entre fases en un digrama de fase. Ya que as mugas entre fases se relazionan con os cambeyos d'organizazión en a materia, como por exemplo lo cambeyo d'estato liquido á solido u un cambeyo d'una estrutura cristalina á una atra, iste zaguer emplego ye parellán á l'uso de fase como sinonimo d'estato d'a materia.