Faixa fluvial

Una faxa flubial ye una plana que bi ha á lo costato d'o cauz d'un río, plana que enantes yera parte d'una antiga plana d'inundazión d'ixe río, pero que dimpués quedó denzima d'a binient plana d'inundazión, que s'ha desembolicato debaxo mientres o río ba erosionando a plana anterior.

A formazión de faxas flubials puet estar faborexita por:

• Alternanzia de periodos secos e plubiosos.
• Cambeyos climaticos que han malmeso a bechetazión e por ixo tamién han fazilitato a erosión.
• Bariazions eustaticas d'o ran de mar.
• Elebazión d'o terreno por mobimientos tectonicos.

A interpretazión d'as faxas flubials d'a Bal de l'Ebro ha tenito bels cambeyos, agora se crei que en os periodos secos os ríos leban menos augua, no podendo trasportar toz os materials que lebaban en os periodos umidos, e rematan erosionando seutors d'a plana d'inundazión, dixando materials sin erosionar á los dos costatos.

En a Bal de l'Ebro os terrenos d'as faxas flubials gosan estar més fertils que os atros terrenos d'arredol e tradizionalment s'ha puyato l'augua d'o mesmo río con l'aduya de zutes e zaicas.

Como una faxa flubial ye por d'enzima d'o nibel d'inundazions d'o río e ye un terreno fertil, ye un lugar tradizional d'edificazión de casas e d'establimiento d'aldeyas, lugars e ziudaz, como por exemplo Alcañiz.