Lipido

Dople capa de lipidos

Os lipidos son biomoleculas insolubles en augua que presentan una alta solubilidat en disolbents organicos, como lo cloroformo.

A etimolochía d'a parola lipido probiene d'a forma prefixata d'a parola grieca lípos, que senifica "grasa" e d'a forma sufixata d'a parola grieca eĩdos, que senifica "aparienzia, fegura".

A esferenzia d'os gluzidos e d'as proteínas, que tienen grupos funzionals carauteristicos, os lipidos no tienen dengún grupo funzional propio. En reyalidat a unica carauteristica común que tienen ye a solubilidat en disolbents organics no polars (benzeno, éter dietilico,...). Ista propiedat tamién los esferenzia d'os gluzidos e as proteínas que son solubles en disolbents polars como l'augua. A razón por a que son insolubles en disolbents polars ye porque as suyas estruturas quimicas son formatas por grans cadenas de carbonios que son apolars.

Os lipidos se pueden dibidir en dibersos grupos:

1. Os lipidos simples son os que nomás contienen carbonio, ocsichén e idrochén, e comprenden os triglizeridos, ditos grasas u azeites seguntes si son solidos u liquidos, as zeras e os esters d'os esterols; aintro d'iste zaguer grupo, un d'os esterols más conoxitos ye o colesterol.
2. Os lipidos complexos contienen, á más, atros elementos e son ditos, por un regular, lipoides; comprenden os fosfolipidos, os esfingolipidos e os glicolipidos.

Una atra clasificazión se basa en a reazión de saponificazión:

1. Se dizen lipidos saponificables os lipidos que pueden reazionar con idrocsidos alcalins ta formar xabons. Toz contienen azetos grasos. Aintro d'iste grupo tenemos:
   1. Azetos grasos
   2. Triglizeridos
   3. Zeridos
   4. Fosfolipidos
   5. Icosanoides
2. Os lipidos no saponificables son aquellos que no reazionan con idrocsidos alcalins ta dar xabons. Son lipidos que no contienen azetos grasos. Bi'n ha de dos tipos:
   1. Esteroides
   2. Terpenoides