Sociedad Deportiva Huesca

A Sociedad Deportiva Huesca (Soziedat Esportiba Uesca en aragonés) ye un club de fútbol aragonés, d'a ziudat de Uesca. Estió establito en 1960 y chuga en a Segunda dibisión d'a Liga española de fútbol. Tien 1200 sozios.

Istoria

O club autual s'establió o 29 de marzo de 1960, dimpués de 4 añadas sin garra equipe representatibo d'a ziudat de Uesca. Manimenos, a S.D. Huesca ye l'ereu d'una serie d'equipes que fuoron amaneixendo y dispareixendo consecutibament en o sieglo XX, con bels entrebalos entre els, y que tienen en común siñals d'identidat tan importants como a equipazión azul y roya.

Huesca Fútbol Club

O Huesca Fútbol Club naixió por as embueltas de 1910, estando Jorge Cajal o suyo primer president. Chugó en os Campos de la Estación y dimpués en os campos de La Cabañera y Villa Isabel (dende 1926). En 1922 s'inscribió en a Federazión Aragonesa con un equipamiento azulgrana, por que beluns d'os suyos enfiladors yeran simpatizants d'o F.C. Barcelona.

Dimpués d'una politica ambiziosa, con l'achuste de chugadors importants, a Federazión sanzionó á lo Huesca F.C en 1927 por l'alto pre d'os achustes y por una imbasión de campo en un partiu contra o Zaragoza, conque se trancó o campo y finalment l'equipe fue forachitato d'a competizión.

Club Deportivo Huesca

Dos añadas dimpués, en 1929, s'establió o Club Deportivo Huesca, que prenzipió á chugar en a Terzera Dibisión Aragonesa, chugando en o campo de Villa Isabel. En a temporada 1932-1933 l'equipe aconsiguió l'aszenso t'a Liga Española de Fútbol. En a temporada 1933-1934, por problemas economicos y esportibos, se retiró o Club d'a competizión, y estió sanzionau por a Federazión. Finalment o club despareixió á meyaus d'a decada d'os 1930.

Unión Deportiva Huesca

Escudo d'a U.D. Huesca

En 1941, una colla d'amigos establioron a Unión Deportiva Huesca. Dimpués de chugar en as categorías aragonesas, en o 1943-1944 debutó en a Terzera Dibisión española. En a temporada 1945-1946, a U.D. Huesca deixó de chugar en o campo de Villa Isabel treslandado-se ta o nuebo San Jorge, con una cabida ta 2000 presonas. En a temporada 1947-1948, a U.D. Huesca ganó o suyo grupo d'a Terzera Dibisión chugando a fase d'aszenso t'a Segunda Dibisión, pero á la fin, no aconsiguió l'aszenso. Finalment l'equipe aszendió t'a segunda dibisión en a temporada 1949-1950 an que i remane por tres añadas. En a suya primer partezipazión (temporada 1950-1951) o club obtiene a millor clasificazión d'a istoria de toz os clubs de Uesca, rematando a liga en 5eno puesto, nomás á 3 puntos de poder chugar a liguilla d'aszenso t'a Primera Dibisión. Entre 1953 y 1956, a U.D. Huesca tornó á chugar en a tercera dibisión, anque ye amanau á tornar á puyar de categoría, pero á la fin o club se disuelbe en 1956.

Sociedad Deportiva Huesca

"Fieles siempre, sin reblar" ye o lema d'a SD Huesca

A S.D. Huesca s'estableixe o 20 de marzo de 1960, dimpués de 4 años sin garra equipo representatibo d'a ziudat. O enfilador prenzipal y primer president estió Patrizio Funes. A primera temporada (1960-1961), a S.D. Huesca chugó en a Dibisión Rechional Preferent y aconsiguió ixe mesmo año puyar t'a terzera dibisión. O club chugaba, como ya eba feito a U.D. Huesca, en o campo de "San Jorge" dica que en 1972 se tresladó t'o campo autual: o estadio de L'Alcoraz. En as temporadas 1962-1963, 1964-1965, 1966-1967 y 1967-1968 a S.D. Huesca chugó a fase d'aszenso t'a segunda dibisión (estando campiona d'o suyo grupo d'a terzera dibisión en as dos zagueras), pero estió eliminau en todas ellas. Dende alabez os suyos resultaus se tornoron piors, pasando á luitar en as siguients temporadas por marrar o deszenso, que á la fin se produzió en a temporada 1972-1973. En a temporada 1973-1974 tornó á puyar t'a terzera dibisión, e ixe mesmo año ganó a Copa d'España d'Afizionaus chugando a final contra o Deportivo Aragón.

Dimpués d'una nueba fallita en a fase d'aszenso de 1975-1976, a S.D. Huesca consiguió aszender Segunda Dibisión B en a temporada 1976-1977 como resultau d'a restruturazión d'a liga española de fútbol, categoría an que melitó dica a temporada 1983-1984. Dende alabez, ha alternau entre a terzera dibisión y a segunda dibisión B, chugando en esta zaguera as temporadas 1990-1991 y 1991-1992; 1995-1996 y 1996-1997; 2001-2002; y dende 2004-2005 dica güe. Si cuasi todas as temporadas en segunda dibisión B teneban l'obchetibo de no deszender de categoría, en a temporada 2006-2007, o club fa un cambio d'endrezera, esbiellando-se a direutiba, a plantilla (con a encorporazión de chugadors d'a plantilla y atros probenients d'o Real Zaragoza). Baixo a endrezera esportiba de Manolo Villanova, a S.D. Huesca consigue por dos bezes consecutibas partezipar en a fase d'aszenso á segunda dibisión A (temporadas 2006-2007 y 2007-2008). Esta zaguera temporada a S.D. Huesca consigue por primer begada l'aszenso t'a segunda dibisión A.

Equipazión

• Primera Equipazión: Chambreta azulgrana, pantalons azuls y calzas azulgranas.
• Segunda Equipazión: Chambreta con a cruz de San Chorche, pantalons y calzas blancos.
• Segunda Equipazión: Chambreta y pantalons doratos y calzas negras.

Plantilla 2008/09

Num. Posición Chugador 1 POR Eduardo 2 ESF Robert 3 MEY Luís Helguera 4 ESF Paco Borrego 5 ESF Chechu Dorado 6 ESF Rigo 7 DEB Ramón 8 ESF Vara 9 DEB Roberto 10 MEY Camacho 11 MEY Felipe 12 MEY José Vegar 13 POR Larrosa 14 ESF Ripa

Num. Posición Chugador 15 MEY Sorribas 16 MEY Edu Roldán 17 DEB Rubén Castro 18 MEY Lalo 19 MEY Rodri 20 ESF Corona 21 ESF Jaume 22 MEY Sastre 24 DEB Nico Medina 25 POR Miguel - MEY David Pérez - MEY Koke - MEY Jon - DEB Ramón Pereira

Estadio

L'Alcoraz

Articlo prenzipal: L'Alcoraz.

A S.D. Huesca tiene a suya seu y chuga os partitos como local en o estadio de L'Alcoraz, con una cabita de 8000 presonas, y que s'inauguró o 16 de chinero de 1972.

Datos d'o club

• Temporadas en 1ª: 0
• Temporadas en 2ª: 1 (3 temporadas i estió a U.D. Huesca)
• Temporadas en 2ª B: 15
• Temporadas en 3ª: 30
• Temporadas en 1ª aragonesa: 2

• Millor posizión en la liga: 2º en Segunda dibisión B (temporadas 06-07 y 07-08).

• Subcampión d'a Copa R.F.E.F. (2006)
• Campión d'a Copa d'España d'Afizionaus (1974)
• Campión d'a Copa R.F.E.F. - Fase Aragonesa (1993, 2005)

Enrastres esternos

• (es) Pachina ofizial d'o club.