Seu d'o Salvador de Zaragoza

A seu de nueis

A Seu d'o Salbador de Zaragoza u más conoxita simplament con o nombre de Seo ye una d'as dos seus metropolitanas de Zaragoza, chunto con a basilica e seu d'o Pilar.

Construyita en o mesmo puesto á on d'antis más yera o foro román de Caesaraugusta e más tardi a mezquita mayor de Saraqusta, d'a cuala encara s'alza o minaret. O edifizio prenzipió á construyir-se en o sieglo XII en estilo romanico integrato en a mezquita e ha tenito asabelas reformas e enamplazions dica l'año 1704 cuan se remata la suya torre con un chapitel barroco.

Autualment a Seo ye una ilesia de zinco naus e seis trampos acubillatos por una buelta de cruzería que en tien a mesma altaria, lo que fa que a forma d'a ilesia parexca cuadrata. En a capezera se situgan dos absides (d'os zinco que bi eba orichinalment) e, en o canto d'a epistola, sobre dos d'os desaparexitos, se construyó a sacristia. En o extremo d'o canto d'o ebanchelio se fazió a «parroquieta» con a sepoltura de Lope de Luna.

A estrutura d'as naus se refirma con os contrafuertes carauteristicos d'o gotico tardano (e no con arbotants que ye más abitual en o estilo gotico clasico) que son tancatos con muros formando capiellas interiors.

O material emplegato en a suya construzión ye sobre tot o ladriello, abitual en l'arquiteutura aragonesa.