Articlo definiu

L'articlo definito u articlo determinato ye una sozcategoría gramatical con funzión de determinar un nome que ya se conox. Formalment ba enantes que o sustantibo, con o que concuerda en chenero e lumero.

L'articlo definito en muitas luengas neolatinas probién d'o pronome demostratibo ille, illa, illud. Bi ha articlos definitos deribatos de ipse, ipsa en bellas luengas e dialeutos d'as costas d'a Mediterrania ozidental.

L'articlo definito en aragonés

l'Articlo prenzipal d'este alpartato ye Articlo definito en aragonés.

En aragonés autual a forma mayoritaria ye o, os, a, as, que se deriba de lo, los, la, las que bi ha en atras luengas neorromanicas e que encara ye cutiano en bellas bariedaz como cheso, aragüesino e nabalés u que se puet sentir coesistindo con o paradigma mayoritario en bellas parzanas d'a Chazetanía u Sobrarbe.

L'articlo definito en catalán

l'Articlo prenzipal d'este alpartato ye articlo definito en catalán.

En catalán ye normatibo l'articlo el, els, la, les cheneralizato dende os nuclios urbans de Barzelona y Balenzia. Este sistema se deriba de lo, los, la, les de lo mesmo tipo que en atras luengas neorromanicas. En catalán oriental ye present atro paradigma clamato articlo salato común con o sardo e bella bariedat oczitana e que se deriba d'o latín ipse, ipsa, pero que ha retaculato en a Edat Meya debant d'a espansión d'os deribatos de illum, illa.

L'articlo definito en oczitán

Tamién presenta formas deribatas de lo, los, la, las e presenta unas bariants dialeutals que tienen paralelismos con o franzés, o catalán e l'aragonés.

Referenzias

• Manuel Alvar. "ESTUDIOS SOBRE EL DIALECTO ARAGONÉS [sic]" . Institución Fernando el Católico. (1987).
• Anchel Conte et al. "EL ARAGONÉS: IDENTIDAD Y PROBLEMATICA DE UNA LENGUA". Librería General (1982).
• Francho Nagore "GRAMATICA DE LA LENGUA ARAGONESA". Mira Editores. (1989).
• Chabier Tomás Arias "EL ARAGONÉS DEL BIELLO SOBRARBE". Instituto de Estudios Altoaragoneses. (1999)