Tinenza

La Tinenza u Tenenzia ye una estituzión meyebal esclusiba de lo Reino d'Aragón.

Lo reino d'Aragón dende lo sieglo XI yera costituito por TERRA REGIS ("tierra de lo rei") como por la HONOR REGALIS ("onor reyal"). La TERRA REGIS la formaban zercuscrizions bellas politicas que china china e por prozesis diferens eban esdebenito propiedat de lo rei: Aragón, Sobrarbe e Ribagorza, primero, lo reino de Zaragoza dimpués. La relazión de lo rei con los abitadors de cadaguna d'ellas yera diferent, e tamién conserboron la suya tradizional estrutura interna. La HONOR REGALIS la formaban bellas zercuscrizions territorials que lo monarca gosaba entregar a los barons pa que las almenistrasen en nome suyo. Tamién s'adibioron en la onor reyal un camatón de biens de diferens clases como monesterios, ilesias, menas, salinas, molins e diferens tierras.

Lo rei yera obligato a asegurar que los suyos barons tenesen una bida digna, encara que estos lo compensaban con la suya aduya melitar. La traza que teneba lo rei pa compensar més a sobent d'aduya melitar de los suyos barons yera la entrega de biens, clamatos onors, que formaban parte de la HONOR REGALIS, ye dizir, los nobles "teneban" la tierra u a begatas una funzión publica en ella, en nome de lo rei, e por ixo se clamaban "Tenients" (TENENTES en latín).

La Tinenza no yera només que un castiello, gosaba comprener tamién un territorio arredol que en dependeba. En ixe territorio los tenients feban de delegatos politicos, e exerzeban funzions almenistratibas, fiscals e chudizials.

Los monesterios eban asegurato la estabilidat sozioeconomica interna de los condatos en los sieglos anteriors a lo XI, a més de la suya siñal relichiosa e cultural, pero las tinenzas costituirán d'astí enta debant la primera organizazión almenistratiba de lo reino.

Esta estituzión, amanixita en lo sieglo XI, perduró dica finals de los sieglo XII, porque yera cara pa lo rei, e Alifonso lo Batallero creyó atra estituzión menos costosa pa él: La Comunidat d'Aldeyas.

Los TENENTES plural de lo latin TENENS, a qui la documentazión clama tamién a sobent como SENIORES u TENENTES LOCUM, e no tan a sobent PRESIDENTES, MANDANTES, POTESTADES, DOMINANTES u DOMINATORES, preboron de fer que lurs onors estasen ereditarias, d'una traa que no ye estranio que dica cuan s'acotoló la linia masculina u en las minorías d'edat, las mullers exerzan una u bellas tinenzas a la begata. Como s'ha demostrato, en reyalidat los tenients de lo sieglo XI e primera mitat de lo sieglo XII daron orichen a lo naximiento de la primera nobleza aragonesa. L'orichen nazional de los tenients que i eba en aragonés podeba estar muito diberso. N'Aragón i eba tenients gascons, lenguadozians, nabarros, catalans, etz..y en atras tierras podeba aber-ie nobles aragoneses en estituzions equibalents como la beguería catalana.

Las relazions entre lo rei e los tenients suyos yeran bien regulatas. Si lo rei no podeba rebocar la tinenza menos por causas chustas (entre ellas la enfidelidad e la tradizión), lo tenient teneba la obligazión d'estar-li fidel, aconsellar-lo, serbir-lo melitarment, esfender las fortalezas encomanatas e protecher lo reino. Lo SENIOR u siñor por la parte suya, teneba lo dreito d'espleitar la onor, perzibindo las rendas de la tierra e los dreitos de chustizia, a parte d'atras muitas.

La importanzia melitar e defensiba de las tinenzas cambeyó, como ye normal, asinas como abanzaba la reconquiesta. Una tinenza en la tierra de muga u estremadura esdebeniba interior con lo tiempo. La mayor parte de los siñors en teneban encomandatas de las dos clases. Podemos destacar como més importants en l'Aragón autual (sin contar las tinenzas que pasoron a depender de lo reino de Nabarra dimpués de morir lo Batallero):

• Abizanda
• Agüero
• Alquezra
• Atarés
• Ayerbe
• Balbastro
• Belchit
• Biel
• Boleya
• Borcha
• Buil
• Calatayú
• Daroca
• Exeya
• Epila
• Estada
• Fariza
• Fuents
• Uesca
• Lobarre
• Luesia
• Luna
• Mont Clús
• Monzón
• Moriello de Galligo
• Olsón
• Perarruga
• Pina
• Ricla
• Ruesta
• Sos
• Tarazona
• Taust
• Tergüel
• Uncastiello
• Urreya de Xalón
• Zaragoza

La lista de nomes de tenients ye interminable, pero lo suyo estudeyo ha permeso recostruir arbols chenealochicos que a trabiés de los dos sieglos de bichenzia de la estituzión, cuan se formó la primera nobleza de lo reino, mos leban a la epoca de Chaime I lo conqueridor, en meyo de lo sieglo XIII. De lo sistema de tinenzas amanixioron los Galíndez, Luna, Ximénez d'Urreya, Cornel, Fortuñons, Lizana, Azagra, Eril, Azlor, Bardaxí, Calasanz, entre atros. La suya importanzia politica, encara que de trazas parzials, ha estato estudiata d'alto u baxo a trabiés de la documentazión que bi n'ha. Queda por saper, en la mayor parte de los casos, lo poder reyal d'estas familias, l'acumulazión de biens, por un regular en forma de tierras, lo que permetiría configurar lo inizio u antezedents de los siñoríos aragoneses d'orichen nobiliario.