Orden d'o Hespital

A Cruz de Malta, simbolo d'os espitalers

A orden de San Chuan de Cherusalén (tamién conoxita como orden de San Chuan d'o Espital de Cherusalén, orden d'os chirmans espitalers u orden de Malta) se fundó con unas fins beneficas pa esdebenir dimpués un cuerpo armato á l'estilo templer con gran fama por os feitos d'armas en os que partiziporon.

L'orichen d'esta orden de caballería se remontan á l'año 1084 cuan uns mercaders d'a ziudat d'Amalfi, en o reino de Nápols, dezidioron fundar un espital pa pelegrins á lo costato d'a ilesia d'o Santo Sepulcro de Cherusalén, baxo l'abocazión de San Chuan Batista. Este templo yera tan á man que la chent clamó á la orden como Orden de San Chuan d'o Espital de Cherusalén.

Dimpués que os cruzatos conquerisen a Ziudat Santa en 1099, o primer mayestre d'a orden, o probenzal Gerard de Sant Geniés, que os documentos zitan como fundador y como prior, dezidioron estender a obra por Palestina, Siria y mesmo Europa, con un rosario d'Espitals en a rota de pelegrinache ta Tierra Santa.

Dimpués d'a derrota final de Alifonso I Lo Batallero en Fraga, y binient muerte, en o testamento suyo os espitalers i feguran chunto con os templers y atros como hereders d'o reino, o cualo permeterá l'establimiento d'a orden en o Zentro y Sur d'Aragón.

Remon Beleguer IV creyó en Amposta un priorato independient d'o priorato de San Chil de Probenza, que yera de qui dependeban dica allora os espitalers catalans. Este priorato se clamó Castellanía d'Amposta y en dependerán con o tiempo a más gran parte d'as encomiendas y bailías d'a Corona d'Aragón.

A primera siede que tenioron yera en Cherusalén, fendo-sen dimpués cargo en 1142 de lo impresionant Castiello de lo Crac de los Caballers, a man de Trípoli, y en fazioron una fortaleza inespugnable. Dimpués la caita de Cherusalén en mans de Saladín en 1187 (en la que murió lo Gran Mayestre de la orden), pasó ta San Chuan d'Acre, on costruyen un gran espital. Una begata que espulsoron a los cristians de Tierra Santa (1291), pasoron ta lo reino de Chipre e d'allí ta la isla de Rodas, que conquerioron en 1310. La orden, clamata agora de San Juan de Cherusalén e Rodas, esdebenió una potenzia nabal en la Mediterranio. Con los espitalers Rodas esdebenió una fortaleza inespugnable que resistió cinco setios durismos. Un munebregán castellán d'Amposta esdebinió Gran Mayestre en o sieglo XIV: Johan Ferrández d'Heredia, e n'as Cronicas de los Chudezes de Tergüel dizen que yera un Mayestre de Rodas.

Lo Lo zaguer setio de Rodas, en 1522, mandato por Solimán lo Mañifico, duraría seis meses. A la fin, la orden ha de capetular e albandonar la isla. Dimpués la espulsión, s'establioron por breu tiempo en Sezilia, dica que en 1530, o Rei Carlos I d'España, con lo beneplazito de lo papa Climent VII lis donó Malta, e por ixo tamién se claman a Orden de Malta. A més de Malta lis zedió las islas de Gozo, Comino e Tripoli. En 1565 defendioron Malta eroicament d'una imbasión otomana.