Neerlandés flamenco

O flamenco (en neerlandés Vlaams) tamién dito neerlandés flamenco (Vlaams-Nederlands), neerlandés belga (Belgisch-Nederlands, pronunciau ˈbɛlɣis ˈneːdərlɑnts), u neerlandés meridional (Zuid-Nederlands), fa referencia a todas as variedatz d'o idioma neerlandés charradas en Flandres, a parti norte de Belchica. O termin "flamenco" s'emplega en a o menos cinco casos. Istos son, en orden de más cheneral a más concreto:

1. como forma informal pa denominar a o "idioma neerlandés" en Belchica, fendo referencia tanto a o neerlandés estándar emplegau astí, como a totz os dialectos. Os lingüistas miran d'evitar l'uso d'o termín "flamenco" en iste contexto y s'estiman más de fer servir "neerlandés-belga" u "neerlandés meridional".
2. como sinonimo d'a parla intermeya conoixida como tussentaal.
3. pa fer referencia a qualsiquiera d'os dialectos locals d'o neerlandés en quasiquier puesto de Flandres.
4. pa referir-se a os dialectos charraus en l'antigo condau de Flandres (actualment as provincias de Flandres Occidental y Oriental en Belchica, o Flandres zelandés en os Países Baixos y o Flandres francés en Francia).
5. como sinonimo pa os dialectos no estándares d'a provincia de Flandres Occidental y Flandres francés, conoixius por un regular como "flamenco occidental".

Bi ha quatre dialectos principals en a rechión de Flandres: o flamenco brabant, o flamenco oriental, o flamenco occidental y o limburgués. Os dos zaguers gosan considerar-se como luengas (rechional) independients. A tamas d'os suyo nombre, o brabant constituye o dialecto que mas contribuye a neerlandés flamenco tussentaal. A combinación d'as rechions, culturas y pueblos d'a belchica de parla neerlandesa (que consiste en as provincias de Flandres Occidental, Flandres Oriental, Brabant Flamenco, Anvers, Limburgo, y historicament Bruselas) se conoixe con l'adchectivo "flamenco". "Flamenco" tamién s'emplega pa referir-se a una d'as luengas historicas charradas en l'antigo condau de Flandres.

Linguisticament y formal, o termín "flamenco" fa referencia a la rechión, cultura y pueblos d'o norte de Belchica u Flandres. O pueblo flamenco charra o neerlandés (belga) en Flandres, a parti flamenca de Belchica. O "neerlandés belga" ye una mica diferent d'o neerlandés charrau en os Países Baixos, mas que mas en pronunciación, lexico y esprisions. Pareixidas esferencias existen en atras luengas, como en l'anglés (Australia, Nueva Zelanda, Canadá, Reino Uniu, Estaus Unius, Sudafrica, etc.), o francés (Belchica, Canadá, Francia, Suiza, etc.) u o portugués (Brasil, Portugal, etc.). As esferencias no son prou significativas como pa constituyir una luenga independient (ya que l'anglés americán, l'anglés australián, o francés canadiense u o portugués brasilenyo no s'esferencian prou d'as suyas fuents europeas pa considerar que sigan luengas independients).