Arbutus unedo

Alborzera
Arbutus unedo
Clasificación scientifica
Dominio: Eukaryota Reino: Plantae División: Magnoliophyta Clase: Magnoliopsida Orden: Ericales Familia: Ericaceae Chenero: 'Arbutus' Especie: ''A. unedo''
Nombre binomial
Arbutus unedo

L'alborzera (Arbutus unedo), tamién dita modrollera u arbetón, ye un arbusto u arbolet de fuella perén d'a familia d'as ericazias.

Carauteristicas

Crex dica una altaria d'uns 5 á 10 m, raramén dica 15 m. O trallo ye royisco, con crepazas, podendo plegar ta os 80 cm, e la corona ye pompuda e redondiata. As fuellas son brilans, de coda curta, d'un berde escuro, con una largaria de 5 á 10 cm e una amplaria de 2 á 3 cm, e tienen os cantos sarratos. As flors son blancas, rara bez d'un rosato clarizo, acampanatas, con un diametro de 4 á 6 mm.

O fruto ye l'alborza, un lulo amarillenco en primeras e bien royo dimpués, d'1 á 4 cm de diametro, de toque aspro, que matura á l'año, ta cuan l'alborzera torna á florexer. As simiens se troban en metá d'o lulo e son chiquetas e de color parda.

Ábitat

L'alborzera ye espardita per a rechión mediterrania e per a costa atlantica de l'ueste d'Europa. O suyo ábitat natural ye en maticals, costeras, peñons, ezt.

Usos

Alborzas

As alborzas puede minchar-sen; son una mica dulzes, anque a suya sabor ye más bien xasca e granosa. (O bocable latín unedo sinifica en mincho un).

Tamién pueden fermentar-sen ta quitar-ne bebitas alcolicas.

A crosta s'ha emplegato en medizina natural como diuretico.

Chardinería

L'alborzera ye un arbolet que se beye á ormino en bels parques e chardins per o colorito d'os lulos suyos.

Tolera millor os puestos an fa una mica de calor, ya que son prou sensibles á las cheleras.

Curiosidaz

En o escudo d'a billa de Madrid, i feguran una alborzera e una onsa que se refirma sobre o tronco.

an:Alborzera