Confederación Cenacha

Os Zenacha u Sanhandja son una confederazión de tribus berbers con muita importanzia en a Edat Meya dica o S XII.

Zechanas en l'Alta Edat Meya

En o periodo preislamico dominaban setors zentrals de o Magreb y s'estendioron en o Sahara profundo con l'aduya de o dromedario. Dica o S IV os dromedarios no s'emplegaban guaire en os confins de o Sahara zentral y ozidental. Se crei que os Zenachas introduzioron o dromedario en o Sahara sudozidental.

Zenachas en a Edat Meya musulmana

Dimpués de os primers tiempos de a conquista arabomusulmana, cuan ya bi ha muitos testos escritos trobamos diferens confederazions clamatas Zenacha, en dos arias prinzipals y en arias menors

En o Magreb central, sopre tot en arias costeras d'Archelia y Tunez, d'on salen os zirins que gobernoron en Ifriquiya y estioron aliatos de os famititas d'Echipto contra os Zenatas y os Omeyas de l'Al Andalus dica o S XI. Cuan os zenachas dixoron d'obedexer a os fatimitas, estos nimbioron tribus arabes beduinas clamatas Banu Hilal y Banu Sulaim que desarticuloron l'agricultura y la soziedat sedentaria berber: os abitans de as planas abandonoron l'agricultura y s'arabizoron, y la soziedat berber agricola sedentaria nomás s'alzará que en zonas bien defenditas de montaña como as atuals cabilias.

Bi eba zenachas en enclaus aislatos en Marruecos, sopre tot en a costa ozidental, y en l'Al Andalus. En Zaragoza abitaban os arrabals a l'ueste d'on güei ye o paseyo independenzia y dioron nome a la Puerta Zinechia. En Granada a mesma familia zirín i fundó un reino taifa.

En o Sahara Ozidental se claman Zanachas tres tribus que prozedeban de l'Adrar:

• Lamtuna (Entre o Sur de Marruecos, o Senegal y o Niger)
• Yoddala (Costa de l'atual Mauritania)
• Netufa, (A l'este de os Lamtuna)

A tres yeran situazión de semibasallache respeuto a o reino negro de Wagadú. Os zenacha saharians estioron os zaguers berbers pagans. As leyendas los fan fundadors de o reino de Wagadú. Estas tribus prebaban de controlar as rutas comerzials entre Wagadú y o Magreb. En o S IX os berbers prenioron l'oasis d'Adaugost, de mayoría berber, dimpués d'un lebantamiento contra Wagadú.

Una colla de lamtunas s'islamizó seguindo a ortodocsia sunni y prenió o poder de tot o norueste africán y parte de l'Al Andalus, (Almorabiz)

Zenachas atuals

Encara trobamos Zenachas en a Kabilia Archelina, estando una de as tres fazions de kabilencos chunto a os Zuwawa y os Ketama. Ocupan os terrens a l'ueste de Dalis.

En o Sahara ozidental s'arabizoron en os zaguers sieglos dando lugar a os mauri de o sur de Marruecos, Tinduf, Malí y Sahara Ocizental, (Saharagüis), quedando un chicot grupo que encara charra berber, os Zenaga en as marguins de o río Senegal, a lo que dan nome, entre Mauritania y Senegal.

En Marruecos encara esisten os Zenacha Srir, (Culata Zenacha) que dica fa pocas decadas encara charraban berber.