Casa d'o Sarrastanyo

Iste articlo tracta sobre O Sarrastanyo, pardina d'o municipio de l'Aínsa-Sobrarbe. Ta altros usos d'o toponimo «Sarrastanyo» se veiga Sarrastanyo (desambigación).

A casa d'o Sarrastanyo (oficialment, en castellano, «El Sarrastaño») ye una pardina aragonesa d'o municipio de l'Aínsa-Sobrarbe, en a comarca d'o Sobrarbe y a provincia de Uesca. Actualment se troba despoblada.

Cheografía

A casa d'o Sarrastanyo ye una casa sola, con bellas bordas y edificios auxiliars, que se troba en o sarrato d'o Sarrastanyo (d'a on que quita lo suyo nombre), en a cara d'o soaso de Buil que mira t'a valle d'a Cinca (norte y noreste). Se troba totalment espaldada en l'actualidat porque fa muitos anyos que se despobló.

Ye en un puesto muit elevau sobre a valleta d'o barranco d'a Capana, en dominando dende alto ixa pardina y tamién l'aldeya de Liners, que ye en a man cuentra d'o barranco. Se i puede arribar por o camín tradicional que uniba Liners con Santa María de Buil, que recibe o nombre de «os Dineretz» por a important presencia de fosils de Nummulites en a penya, pero tamién dende a Capana, pos astí i naixe unaltra pista que s'achunta con a primera en a casa.

Toponimia

Sarrastanyo ye un toponimo que se composa de dos posibles lemas: «sarra» y «estanyo». O primer ye una forma arcaica, actualment desapareixida en as parlas vivas, d'a parola «sierra», pero que ha quedau fosilizada en o toponimo. A segunda puede fer referencia a bella acumulación d'augua que n'habe tiempos i podría haber habido.