Puerto de la Pez

Este articlo parla sobre o puerto de la Pez. Pa atros emplegos d'a parola Pez se veiga Pez (desambigación).

O puerto de la Pez (en francés Port de la Pez) ye un puerto de montanya situau en a muga entre Aragón y Francia y que une a val de Chistau, en Aragón, con a val de la Pez, en Occitania. Se troba a o sud de Lodenvièla, en o departamento d'os Altos Pireneus. Con una altaria de 2.460 m, ye o camín mas simple ta acceder a o macizo de Pocetz dende Francia.

Se troba entre a punta d'es Guerréis (2.972 m) y a punta de la Pez (3.022 m).

Cheografía

O puerto de la Pez, quan se i puya dende o costau francés, se caracteriza por una plana prou luenga tallada por brecas prou fundas y delicadas de trescruzar. A la fin d'ixa plana, torna a pendient, fendo-se mas gran en plegar ta o zaguer trampo. Dimpués de tres horas de marcha, arribamos a una chicota breca equipada con un cable. Dende aquí, o camín pasa por o costau aragonés y, dimpués d'haber-ne baixau un poquet, aduga enta o puerto de la Pez.

Quan prencipia a baixada enta la val de Chistau, o paisache ye en primeras desertico, encara que prou apreciau por as marmotas. Manimenos, a mida que se contina baixando enta a val, bi ha mas y mas vechetación y torrents d'augua ta rematar en un entorno paradisiaco amán d'as bordas de Viadors.

Puyada

Se puet acceder a o puerto de la Pez por:

• a val de la Pez (dende a central electrica de Tramasauguas).
• a val de Chistau (dende o cubilar de Viadors).
• a crencha de Vachimala (dende o puent d'o Prat, a traviés d'o puerto d'Auguas Tuertas y a puyada d'a punta de Vachimala).
• a crencha de Culfreda-Luston y baixando a o puerto por a punta d'es Guerréis (2.972 m).