Planeta

Fila superior: Urano y Neptuno; fila central: Tierra, a estrela nana blanca Sirius B, Venus. Abaixo d'os anteriors se veyen en a fila superior Marte y Mercurio y en a fila inferior: a Luna y as planetas nanas Plutón y Haumea (a escala).

Una planeta ye un cuerpo sin de luz propia (que no ye, por tanto, una estrela) que chira arredol d'una estrela; que tien forma esferica, u quasi esferica (ya que en tener prou masa, a suya gravedat supera as fuerzas d'o cuerpo richido); y que ye o elemento prencipal adintro d'a suya orbita; seguntes a definición d'a reunión d'a Unión Astronomica Internacional de Praga, de l'anyo 2006. Asinas, se diz planeta a cadagún d'os cuerpos que describen orbitas elipticas arredol d'o Sol u, en cheneral, d'una estrela. Son planetas d'o sistema solar: Mercurio, Venus, a Tierra, Marte, Chupiter, Saturno, Urano y Neptuno. No'n son Ceres que se considera una planeta nana, ni Plutón, considerato o paradigma d'as planetas nanas transneptunianas muitas d'as qualas encara no tienen nombre.

Planetas d'o sistema solar

I hai ueito planetas en o nuestro sistema solar. Son (empecipiando per o mas amán d'o Sol): Mercurio, Venus, Tierra, Marte, Chupiter, Saturno, Urano y Neptuno. Istas planetas pueden estar clasificadas en quantas categorías seguntes a suya composición:

• Planetas terrestres: son planetas componidas prencipalment per penyas: Mercurio, Venus, Tierra y Marte.
• Planetas chigantz: son as planetas muito mas masivas que los terrestres: Chupiter, Saturno, Urano y Neptuno.

A la suya vegada se pueden distinguir dentre:

• Chigantz gasiosas: que son componius prencipalment per hidrochén y oxichén: Chupiter y Saturno.
• Chigantz chelatas: que son componius d'augua, metano y amonia con atmosferas densas de hidrochén y helio: Urano y Neptuno.

Exoplanetas

Os exoplanetas son aquellas planetas que son difuera d'o lo nuestro sistema solar. Dica octubre de 2019 s'han descubierto 4118 exoplanetas que orbitan en 3063 sistemas solars.