Mida

Contimparacion de midas entre un ser humano y diferents especies de tiburons actuals y prehistoricas. En a zona superior se i vei una referencia de mesura en metros.

A mida ye la magnitut u dimensión d'un obchecto u elemento. Puet referir-se a la largaria, amplaria, altaria, diametro, perimetro, aria u volumen. As midas se mesuran u se miden en unidatz de mesura.

A diferencia entre «mida» y «mesura» en aragonés ye más ambigua que en atras luengas romances con estándar más asentau, como lo catalán, en o qual o estándar marca un sentiu de tamanyo pa la parola «mida» mientres que reserva «mesura» pa l'acción de mesurar y pa las unidatz en que se fa esto. Con este significau pareix que trobamos a parola mida en textos historicos de la val d'Ebro y en o vocabulario aragonés de Juan Moneva, que en os anyos 1920 la documentaba asinas en Zaragoza, Ribera de Xalón, en Blesa y en Cabanyas d'Ebro.

Manimenos, a parola s'emplega en Sobrarbe y Ribagorza tamién con o sentiu mesmament d'unidat de mesura, en especial as tradicionals: as «midas» aragonesas como o quartal, o nietro, a vara, a libra, l'arroba, etc.

Exprisions

• Dar la mida: Tener a mida chusta u suficient pa un menester. En sentiu literal: «Ixe barbo no da la mida, ya lo puez tornar a'l río». En sentiu figurau: «Y dices que se quiere presentar a alcalde? Ixe no da la mida!».
• Tomar midas: Mesurar. «Pos si este ye el forato pa l'almario, ya tomaré midas.», «Ya l'has tomau a mida a'l caixón?» , etc. Tamién se diz tomar mesuras.
• Fer a mida: Fer una cosa con a mida chusta, p. ex. como lo fa un sastre. «La camisa y la chaqueta le'n von fer fer a mida.»
• Buena mida: Cantidat abundante y sin mesurar: «Boh, panizo, estianyo en tendremos buena mida.»
• Pasar de mida: Meter excesiva cantidat. «T'has pasau de mida con l'azúcar.»
• No trobar/tener ni mida ni estrimo: No pensar as parolas que se diz u dicir cosas sin sentiu.

Se veiga tamién

• Unidat de mesura.
• Mesura.