Basquismos en aragonés

Os vasquismos en aragonés son palabras que s'han introdueito en diferents tiempos en o lexico aragonés, belunas en o latín local dende a fase protovasca representada por l'aquitán prerromán, belunas en o romanz navarro-aragonés en tiempos medievals y belatras en tiempos recients y comuns con os atros idiomas romances vicins. A influencia vasco-aquitana no se manifiesta només que en o lexico, tamién en a fonetica y sintaxi.

No todas as palabras comuns entre o vasco y as luengas romances pirenencas son vasquismos u palabras orichinalment vascas, en bell caso pueden estar palabras indoeuropeas antigas (sorotaptico, celtas u latinas que ha asimilau o vasco y as luengas vecinas). Os vasquismos en l'aragonés dan preciosas informacions sobre a historia lingüistica d'Aragón y desfan as tesis de filologos que afirman que l'aragonés no se charró en Val d'Ebro, por presentar-se estos vasquismos en o castellán d'Aragón en puestos tan a lo sud como o Mayestrato u la comarca de Xiloca con a sola explicación que yeran usuals en o idioma navarro-aragonés d'os altoaragoneses y navarros que participioron en a repoblación dimpués d'a reconquiesta.

Fonetica

Bi ha palabras d'orichen latín pero que presentan caracters foneticos propios d'o vasco pero tamién bi ha una probable influencia fonetica vasca que feba part d'o substrato prerromán de l'Alto Aragón y Navarra y que condicionó bella lei fonetica dende o latín ta lo romance navarro-aragonés.

Os vasquismos en aragonés tienen una fonetica que da información sobre os cambios foneticos que se producioron dende o latín ta l'aragonés. D'esta traza as palabras marguin y marguinazo son d'orichen latín pero han arribau en l'aragonés dende o vasco (ye dicir que os pueblos vasco-aquitans de l'Alto Aragón asimiloron o latinismo marginem y una vegada arromanzaus conservoron una variant d'este latinismo). Si a palabra marguinem hese arribau por vía patrimonial habría esdeveniu marchen pareixiu a atras luengas vicinas, y no marguin conservando a pronunciación d'a G latina.

Tradicionalment s'ha considerau que a tendencia a sonorizar as oclusivas xordas intervocalicas latinas en Europa Occidental ye un efecto d'o substrato celta y que en a suya conservación u resistencia a sonorizar bi ha una explicación a partir d'atros substratos, que en o caso de l'aragonés y gascón serían de tipo vasco-aquitán. Manimenos Francisco Villar y atros autors qüestionan esta hipotesi de l'orichen celta d'a sonorización en a peninsula iberica a la luz d'as actuals conoixencias d'o celtibero, o qualo replantearía a qüestión d'a presulta influencia vasco-aquitana en a tendencia a la suya conservación en aragonés y gascón.

A tendencia sonorización dezaga de liquida de l'aragonés central tamién s'ha quiesto relacionar con o substrato vasco porque la observamos en os latinismos presents en vasco como abendu (cognato de l'aragonés aviento).

Lexico

Vasquismos probables en aragonés son:

• Abarca.
• Agüerro: cheosinonimo de "Santmigalada".
• Caparra.
• Escarrón: cheosinonimo d'"acirón".
• Gabardera: rosera borde.
• Ibón: "laguna", "estanyo" glaciar, pero tamién "manantial".
• Lurte.
• Magoría.
• Muga.
• Naya: se troba con a mesma pronunciación y significau en vasco soletán.
• Sabaya.
• Sucarrar.

Bibliografía

• (es) Anchel Conte et al. El aragonés: identidad y problemática de una lengua. Colección Aragón. Librería general.
• (es) Miguel Ánchel Barcos, El Aragonés Ansotano: estudio lingüístico de Ansó y Fago; Gara Edizions. Zaragoza, 2007.