Orden d'o Hespital

Plantilla:Ficha d'unidat melitar A Orden de Sant Chuan de Cherusalem (tamién conoixita como Orden de Sant Chuan d'o Hespital de Cherusalem, Orden d'os Chirmans Hespitalers u Orden de Malta) se fundó con unas fins beneficas pa esdevenir dimpués un cuerpo armato a lo estilo templer con gran fama por os feitos d'armas en os que participoron.

Os hespitalers en Tierra Santa

L'orichen d'esta orden de caballería se remontan a l'anyo 1084 quan uns mercaders d'a ciudat d'Amalfi, en o reino de Nápols, decidioron fundar un hespital pa pelegrins a lo costato d'a ilesia d'o Santo Sepulcre de Cherusalem, baixo l'advocación de Sant Chuan Baptista. Este templo yera tan a man que la chent clamó a la orden como Orden de Sant Chuan d'o Hespital de Cherusalem.

Dimpués que os cruzatos conquerisen a Ciudat Santa en 1099, o primer mayestre d'a orden, o provenzal Gerard de Sant Geniés, que os documentos citan como fundador y como prior, decidioron d'extender a obra por Palestina, Siria y mesmo Europa, con un rosario d'Hespitals en a rota de pelegrinache ta Tierra Santa.

A primera seu que tenioron yera en Cherusalem, fendo-sen dimpués cargo en 1142 de lo impresionant Castiello de lo Crac de los Caballers y en facioron una fortaleza inexpugnable. Dimpués la caita de Cherusalem en mans de Saladín en 1187 (en la que morió lo Gran Mayestre de la orden), pasó ta Sant Chuan d'Acre, on construyen un gran espital.

Os hespitalers en Rodas

Una vegata los cristians fuoron forachitatos de Tierra Santa (1291), os hespitalers pasoron ta lo reino de Chipre y d'allí ta la isla de Rodas, que conquerioron en 1310. La orden, dita alavez de Sant Chuan de Cherusalem y Rodas, esdevenió una potencia naval en la mar Mediterrania. Con los hespitalers, Rodas esdevenió una fortaleza inexpugnable que resistió cinco setios durismos. Un munebregán castellán d'Amposta esdevenió Gran Mayestre en o sieglo XIV: Johan Ferrández d'Heredia, y en as Cronicas d'os Chudeces de Teruel dicen que yera un Mayestre de Rodas.

Lo zaguer setio de Rodas, en 1522, mandato por Solimán lo Magnifico, duraría seis meses. A la fin, la orden ha de capitular y albandonar la isla.

Os hespitalers en Malta

Dimpués la expulsión, s'establioron por breu tiempo en Secilia, dica que en 1530, o Rei Carlos I d'Espanya, con lo beneplacito de lo papa Climent VII lis donó Malta, y por ixo tamién se claman a Orden de Malta. A més de Malta lis cedió las islas de Gozo, Comino y Tripoli. En 1565 defendioron Malta heroicament d'una invasión otomana. Permaneixioron en Malta dica que l'exercito de Napolión los venció.

Primers hespitalers en Aragón

Dimpués d'a derrota final de Alifonso I Lo Batallero en Fraga, y vinient muerte, en o testamento suyo os hespitalers i feguran chunto con os templers y atros como hereders d'o reino, o qualo permeterá l'establimiento d'a orden en o centro y sur d'Aragón.

Remón Belenguer IV creyó en Amposta un priorato independient d'o priorato de Sant Chil de Provenza, que yera de qui dependeban dica l'inte os hespitalers catalans. Este priorato se deciba Castellanía d'Amposta y en dependerán con o tiempo a más gran part d'as comandas y bailías d'a Corona d'Aragón.

Se veiga tamién

• Castellanía d'Amposta
• Soberana Melitar Orden de Malta