Luengas retorromanicas

As luengas reto-romances u reticas son un grupo de luengas romances que derivan d'una luenga comuna que amaneixió en l'aria alpina a lo sud de lo Danubio y que rebló debant de la expansión de las luengas chermanicas, que en la suya zona evolucionoron ta l'alto alemán, y tamién en menor mesura debant de la expansión de bellos idiomas de lo grupo italián.

D'alcuerdo con Heinrich Lausberg se remonta a lo mesmo latín galico que se parlaba en Galia y norte d'Italia y lo vei més arcaizant que l'arpitán. A deseparación d'o retorromanico respecto a l'arpitán se produció por a invasión en forma de falca d'os alamans, seguita por una chermanización. As ciudatz italianas d'o norte aduyoron a estendillar bells dialectos noritalicos que desplazoron a lo retorromanico en os semontans alpins. A colonización bayoaria u baverana de l'Alto Tirol contribuyó a arrinconar més a lo retorromanico. Huei ye trestallato en tres idiomas pareixitos que permiten deducir un común orichen, os dos zaguers son deseparatos por a falca chermana d'o Tirol.

• Rumanch
• Ladín
• Friulán

Variedatz

Comprende diferents seccions:

• Dialectos rumanches (rumantsch): o sursilván, o sutsilván, o surmirán, l'alto enguiadinés u puter y o baixo enguiadinés u vallader forman os cinco dialectos escritos que se parlan en Suiza (en o cantón d'os Grisons), en l'actualidat o numero de parlants de totz istos dialectos chuntos ye de bellas 35.000 personas.
• O interrumanch (rumantsch grischun): mena de lingua franca rumanch emplegada en Suiza ta unificar a ventena de dialectos rumanches, y que se basa mas que mas en o sursilván, o vallader y o surmirán. O interrumanch ye una d'as luengas oficials d'o cantón suizo d'os Grisons.
• Dialectos ladins (ladín): parlaus en os Dolomitas (Italia), se consideran una luenga rechional.
• O friulán o furlán (furlan): parlau en a provincia d'Udine, tien o estatuto de luenga rechional en Friuli-Venecia Chulia.

A o largo d'os sieglos l'avance d'as parlas alemanas y italianas n'ha reduciu muito o territorio, que probablement heba estau contino. Actualment bi ha tres bloques de dialectos retorromanicos, estendillaus por tres arias deseparadas as unas d'as atras. A tamas d'iste isolamiento cheografico y as diferencias destacables que bi ha entre as diferents variedatz, que dificultan a comunicación entre os suyos parlants, se considera que o retorromanico constituye una sola luenga. Socialment bi ha consciencia de chirmandat entre os diferents pueblos de parla retorromanica. En total, o numero de parlants de retorromanico se sitúa entre as 400.000 y as 750.000 personas.

Se veiga tamién

• Heinrich Schmid
• Retorromania