Galacho de Chuslivol

Plantilla:Infobox espazio natural O Galacho de Chuslivol ye un espacio natural aragonés situato en o vico rural de Chuslivol (Zaragoza), en a marguin cucha de l'Ebro.

O nuclio d'o espacio ye o galacho u meandro albandonato de l'Ebro que se formó o 2 de chinero de 1961, a causa d'a mayor riada de l'Ebro en o sieglo XX (4.130 m³/s de caudal: 16 vegatas a valura meya). Por ixo ye dica l'inte o zaguer galacho de l'Ebro.

O galacho ye compreso entre l'actual curso de l'Ebro y un cillo de cheso. Dende o punto de vista d'a cheodinamica externa bi ha un esliz fosilizato que estió activo quan o meandro esgarrapaba a parte inferior d'o cillo, deixando d'estar activo quan o meandro quedó albandonato.

Destaca a vechetación de ribera, con selvas d'alamos, chopos, fraixinos, urmo y amplos carrizals.

Dimpués d'a formación d'o galacho i habió actividat humana con graveras, escarbando grans cavidatz, que esdevinioron lacunas artificials. Una vegada finalizata l'actividat comercial d'istas, o Concello de Zaragoza compró os terrenos, escomencipiando a restauración de l'entorno.

Tanto o nivel d'as lacunas como o nivel d'o galacho pende d'o nivel d'augua de l'Ebro, porque bi ha un aqüifero ocupando tot ixe material aluvial poroso. En epocas de grans creixitas, l'augua de l'Ebro plega a dentrar dreitament en o galacho. Antimás iste galacho recibe as aguas y sedimentos d'o Barranco de Los Leiteros, que aporta gran parti d'os materials solidos como d'augua no provenient d'o propio cauz de l'Ebro.

A evolución natural d'un galacho ye a colmatación, plenando-se con l'aporte de sedimentos aluvials lutiticos y colonización d'a vechetación de ribera. Bi ha antimás ciertos elementos de l'actividat humana que pueden modificar-ne o suyo desarrollo, como a pista forestal que cruza o galacho construyita como via d'acceso ta las anticas graveras. As dos partis d'o galacho que quedan a cada margin d'a pista son conectadas por unas conduccions que fan pasar l'augua y os materials en suspension d'ista quando en tien o suficient nivel. Sin d'embargo a existencia d'a pista tamién favorece o acopio d'os mesmosa ta los suyos terraplens, acelerando muy probablement a suya colmatación.

Figuras de protección

• ZEPA Sotos y mechanas de l'Ebro.
• PIC Sotos y mechanas de l'Ebro.

Se veiga tamién

• Barranco de Los Leiteros.

Vinclos externos

• Se veigan as imáchens de Commons sobre o Galacho de Chuslivol.