Gabasa

Gabasa (Gabasa en castellán; Gavasa en catalán) ye un lugar aragones en a comarca d'a Litera perteneixient a lo municipio de Peralta y Calasanz.

En 1999 teneba una población de 15 habitants.

Cheografía

Gabasa ye situato a 700 metros d'altaria sobre o ran d'a mar, a una distancia de 90 km d'a ciudat de Uesca, a capital d'a suya provincia.

Historia

Seguntes Agustín Ubieto, se documentan as variants Gabassa y Gavasa, y la primer cita d'o lugar estió en 1206, en documentación d'o monesterio de Santa María de Sixena.

Parla

Se i charra un catalán ribagorzán pareixito a lo de Santisteban, Calasanz y Peralta, mes pareixito a las parlas d'a Baixa Ribagorza central, de transición ta l'aragonés.

• A c, ç d'o catalán se prenuncia como z interdental como en aragonés, castellán d'o norte y centro y parlas catalanas d'o Mezquín-Guadalop.

• A rematanza en -es d'o catalán que ye en os plurals femenins y verbos en segunda presona singular se prenuncia /-as/ (vingas y las casas en cuenta de vingues y les cases).

Molimentos

• Ilesia de Sant Martín de Gavasa, una ilesia d'o sieglo XVIII adedicata a Sant Martín de Tours.
• Puent medieval que blinca a caíta d'o río Sosa.
• Congosto de Gabasa.