Matrimonio

Retrato d'o matrimonio Arnolfini, por Jan van Eyck.

O matrimonio ye o reconoiximiento churidico, social y cultural d'una relación estable entre dos personas.

Motivacions

Tien por obchectivo proporcionar un marco de protección mutua u de protección d'a descendencia. Puet estar motivato tamién por otros intreses personals, economicos, sentimentals y como meyo ta obtener bellas avantallas socials.

Dize-se que los latines, o sea por trobar ocasión contra los romanos, o sea por aparentar-se verdaderament con ellos por vía de matrimonios [...], por cubrir lur intención, mostraban que querían fazer parentado o matrimonios con ellos

Matrimonio civil u relichioso

Matrimonio homosexual civil

O matrimonio puet estar civil u relichioso y, pendendo d'a relichión u de l'ordenamiento churidico, os dreitos, debers y requisitos d'o matrimonio son distintos. En a nuestra cultura se formaliza a traviés d'a voda.

Matrimonio mixto u homosexual

Tradicionalment, se denominaba matrimonio a la unión legal entre un hombre (lo mariu) y una muller (la muller).

Primerament, senyora muy excel·lent, quando el dito mossén Pero Martínez fue muerto, veyendo la dita su muller a su marido muerto en tal manera et, ayxí mesmo, veyendo qu'el dito mossén Pero Martínez no tenía parient que en vendicta suyya entendiesse, la dita Yolant de Torrellas acordó de dar su filla a'l dito don Joffre de Castro, el qual por su honra mesma devía entender contra la persona de mossén Cerdany, muyto más thomando su filla por muller. Et por esse esguart, la dita duenya atorgó el dito cassamiento, con ciertas clausulas et condiciones en los capítoles matrimoniales contenidas et expressadas. Et feyto et concordado el sobredito matrimonio, los nobles don Philip et don Joffre, aviendo cobdicia de los bienes de la dita Yolant de Torrellas, senyora de Puyyo, teniendo-se por dito que la vida de la dita senyora de Puyyo sería larga, más que ellos no avían menester, tractoron con hun escudero de la dita senyora, clamado Tripiana, el qual se avía criado [con] el dito mossén Pero Martínez de Moriello, al qual escudero prometioron los ditos nobles mil et D florines, que el dasse yerbas ha su duenya et la matasse; et más, le prometioron que lo cassarían con una donzella de la dita senyora de Puyyo, clamada Joana de Sesé, la qual con el dito Trepiana fue concorde en dar yerbas a la dita su duenya.

Pero ya se reconoixe en más de 20 países lo matrimonio entre personas d'o mesmo sexo: Países Baixos (dende l'anyo 2000), Belchica (2003), Canadá y Espanya (2005),  Sudafrica  (2006), Mexico, Noruega y Suecia (2009), Archentina, Islandia y Portugal (2010),  Dinamarca (2012), , Brasil, Francia, Gales, Anglaterra, Nueva Zelanda y Uruguai (2013), Luxemburgo (2014), Eslovenia, Estatos Unitos, Finlandia y Irlanda (2015).

Lo dot

Se denomina tamién matrimonio a lo dot —conchunto de biens y riquezas— que aportaba la muller en casar-se.

Ítem quiero e mando que, de mis bienes, sían casadas Gostança e Sobirana de Francia, hermanas mías; a las quales sían dados sus matrimonios. A saber es, a la dita Gostança, dos mil sueldos de renda...

Santo matrimonio

O catolicismo denomina santo matrimonio a la unión d'una persona con o suyo dios en entrar en orden relichiosa.

Anthonico d'el Forno, fillo mío. El qual, a mí, en aquellos heredero universal instutuyo. Con tal pacto, vinclo et condición que si el dito Anthonico, fillo et heredero mío morrá menor de edat, o col·locado en orden de sancto matrimonio morrá sin fillos legittimos et de legittimo matrimonio procreados, que todos los bienes que a él en el present testament lexo sían e tornen a'l dito Johanico d'el Forno, fillo mío. Et si el dito Johanico d'el Forno morrá menor de edat, o col·locado en orden de sancto matrimonio morrá sin fillos legittimos e de legittimo matrimonio procreados, que los ditos bienes sían et tornen a las ditas Marica(s) d'el Forno, Sanchica d'el Forno et Guill[e]mica d'el Forno, fillas mías e de la dita María d'el Corral, o a las que en aquel tiempo hi serán.

Cabos d'anyo en a cultura popular

A cultura occidental celebra os cabos d'anyo de casamiento y los asocia a un elemento material. Os mas comuns son os siguients:

• 1^er cabo d'anyo: papel u cotón
• 5^eno: fusta
• 10^eno: estanyo
• 12^eno: seda
• 15^eno: vidre
• 22^eno: bronze
• 25^eno: archent
• 30^eno: perla
• 50^eno: oro
• 60^eno: diamant
• 70^eno: platín

Veyer tamién

• Bigamia.
• Familia.
• Monogamia.
• Poliandría.
• Poligamia.
• Polichinia.