Revolución de mayo

O dito Cabildo ubierto d'o 22 de mayo de 1810, que aprebó a substitución d'o visorrei, en un quadro de Pedro Subercaseaux.

Se conoix con o nombre de Revolución de mayo a los escaicimientos de mayo de 1810 en a ciudat de Buenos Aires en l'actual Archentina, que alavez yera una colonia d'Espanya, estando a capital d'o Visorreinato d'o Río de la Plata. Istos escaicimientos prencipioron o 18 de mayo de 1810, quan plegoron a Buenos Aires as noticias d'a cayita d'a Chunta Suprema Central de Sevilla mientres a Guerra d'o Francés, continoron en a dita semana de mayo dica o 25 de mayo, quan rematoron con a destitución d'o visorrei Baltasar Hidalgo de Cisneros y a proclamación d'a Primera Chunta de Gubierno. Ista destitución s'aprebó en o dito Cabildo ubierto d'o 22 de mayo de 1810.

Se considera por os historiadors que a Revolución de mayo ye o primer movimiento independentista archentín, encara que en realidat no se proclamó a independencia d'Archentina. Formalment, os bonaerenses nomás facioron que no aceptar l'autoridat d'o Consello de Rechencia de Espanya y Indias en considerar que no representaba a lechitimidat dimpués de que, con as ditas Abdicacions de Bayona, o rei Ferrando VII y o suyo pai Carlos IV hesen abdicato en favor de Napolión Bonaparte d'a cadiera reyal d'Espanya. Cal parar cuenta, sindembargo, que ixa aceptación d'a soberanía espanyola yera nomás que un movimiento tactico en aspera de declarar ubiertament a independencia, como escaició en zaguerías o 9 de chulio de 1816 en o dito Congreso de Tucumán.

Vinclos externos

• Se veigan as imáchens de Commons sobre a Revolución de Mayo.