Jack Lemmon

Jack Lemmon (nombre artistico de John Uhler Lemmon III) estió un actor y director cinematografico estatounitense, naixito o 8 de febrero de 1925 en Newton (Massachusetts) y muerto o 27 de chunio de 2001 en Los Angeles (California), con una important carrera cinematografica en o cine estatounitense y quantos premios recibitos por o suyo treballo.

Belunas d'as cintas más significativas d'a suya carrera cinematografica son Mister Roberts (1955, de John Ford y Mervyn LeRoy), Some Like It Hot (1959, Billy Wilder), The Apartment (1960, Billy Wilder), Days of Wine and Roses (1962, Blake Edwards), Irma la Douce (1963, Billy Wilder), The Great Race (1965, Blake Edwards), Save the Tiger (1973, John G. Avildsen), The China Syndrome (1979, James Bridges), Missing (1982, Costa-Gavras), u Glengarry Glen Ross (1992, James Foley).

Premios

L'actor Jack Lemmon recibió o Premio Oscar a o Millor Actor en 1973 por o suyo papel en a cinta Save the Tiger, de John G. Avildsen. En 1955 recibió un Premio Oscar a o Millor Actor Segundario por a suya actuación en Mister Roberts, de John Ford y Mervyn LeRoy; en 1959 fue nominato a l'Oscar a o Millor Actor por o suyo papel en Some Like It Hot, de Billy Wilder; en 1960 fue nominato a iste mesmo premio por The Apartment, tamién de Billy Wilder; en 1962 lo tornoron a nominar por a suya interpretación en a cinta Days of Wine and Roses, de Blake Edwards; en 1979 por u suyo papel en The China Syndrome, una cinta dirichita por James Bridges; en 1980 por a suya actuación en a cinta Tribute, de Bob Clark; y en 1982 por o suyo papel en Missing, ina cinta dirichita por Costa Gavras.

Jack Lemmon recibió tres Premios BAFTA a o Millor Actor: en 1960 por Some Like It Hot, de Billy Wilder; en 1961 por The Apartment, de Billy Wilder; y en 1980 por The China Syndrome, de James Bridges.

Tamién recibió tres Globos d'Oro a o Millor Actor de Musical u Comedia: en 1960 por Some Like It Hot, de Billy Wilder; en 1961 por The Apartment, de Billy Wilder; y en 1973 por Avanti!, de Billy Wilder. Antiparte, en 1991 recibió un Premio Cecil B. DeMille ta tota a suya carrera cinematografica; y un Globo d'Oro a o Millor Actor en Series, Miniseries u Telefilmes en 2000 por Inherit the Wind.

Recibió dos Premio a o Millor Actor d'o Festival de Cine de Cannes: en 1979 por The China Syndrome, de James Bridges; y en 1982 por Missing, de Costa-Gavras.

Vinclos externos

• Se veigan as imáchens de Commons sobre Jack Lemmon.
• (en) Jack Lemmon en IMDb.