Imperio Parto

Lo Imperio Parto u Imperio Arsacida estió un estato con una important potencia politica y melitar iraniana dende l'anyo 247 aC dica l'anyo 224 en l'Antiga Persia. Lo nombre d'Arsacida vién d'Arsaces I, chefe de la tribu Parni que fundó este imperio a meyaus de lo sieglo III aC quan conquirió Partia, alavez una satrapía en rebelión contra lo Imperio Seleucida. Mitriades I de Partia (171 aC-138 aC) ixampló lo imperio prenendo Media y Mesopotamia a los seleucidas. En lo suyo apocheu, lo imperio parto s'estendillaba dende las fuents de lo río Eufrates en l'actual surueste de Turquía dica l'este d'Irán. Lo imperio yera situau en la Rota de la Seda y esdevinió un centro cultural y comercial entre lo Imperio Román y la China Han.

Arsaces I creyó un estato feudal, Mitriades reinó dende l'anyo 171 aC dica l'anyo 138 aC, tenió dende l'anyo 140 aC lo títol de "Rei de reis" y ixemenó lo estato parto a un aria que abracaba l'actual Irán y Mesopotamia. Lo suyo fillo Fraates II clamó a los saka pa combatir a los Seleucidas pero murió en luita contra los mesmos saka.

Mitriades II reinó dende l'anyo 124 aC dica l'anyo 87 aC y con ell lo Imperio Partó tornó a estar poderoso. Los partos topetoron cheopoliticament con los romans por lo dominio de ciertos territorios como Armenia, que esdevinió un "estato-tampón". En l'anyo 53 aC los partos derrotoron a Craso en la batalla de Carre, los en a que los arquers a caballo estioron decisivos en la victoria parta.

Lo Imperio Parto perdió muita influencia politica y terreno con las campanyas de conquista de Trachán, que deposó un rei titere de los partos en Armenia y dimpués la conquirió, como tamién conquirió Asiria y Mesopotamia. Los exercitos romans plegoron a prener Babilonia, Seleucia, a mesma Ctesifont en l'anyo 116, y plegoron a la mesma costa de lo Golfo Persico, pa cruzar lo Khozestán y prener Susa en ixe mesmo anyo.

Los romans mantenioron como muga lo río Tigris y la vanguardia de lo suyo exercito plegó a las primeras montanyas de Persia. Armenia, Asiria y Mesopotamia esdevinioron provincias romanas. Los partos practicoron una guerra de guerrillas con arquers a caballo. A la fin l'abance roman s'aturó por problemas lochisticos y practicoron maniobras politicas. Los romans plegoron a favoreixer a Partamaspates como gubernador titera debant d'Osroes I.

Una vegada muerto Trachán los romans se retiraban y Osroes I deposó a Partamaspates y recobró lo poder. Lo emperador Hadrián evacuó Mesopotamia, que tornó a estar de lo Imperio Parto. Osroes I y Hadrián pactoron en l'anyo 123 una paz duradera. En tiempos de Marco Aurelio torno a haber-ie guerra entre romans y partos, con victoria romana.

En l'anyo 227 lo rei parto Artabán IV fue esconfito por Ardashir, de la dinastía de los Sasanidas.